Shiten të gjitha biletat për filmin “ERA” në Brooklyn Film Festival!

Filmi i metrazhit të gjatë ERA i regjisores Parta Kelmendi po vazhdon t’i shijojë sukseset. Të gjitha biletat për në  Brooklyn Film Festival janë shitur.

Ditë më parë u bë e ditur se ky film ka nisur udhëtimin e tij ndërkombëtar me pjesëmarrjen në Brooklyn Film Festival.

Për këtë ka njoftuar vetë regjisorja dhe skenaristja e filmit, Parta Kelmendi. Me këtë rast, ajo ka falënderuar ekipin dhe të gjithë ata që dhanë kontribut për realizimin e këtij projekti.
“ERA po shkon në New York – Brooklyn Festival.

Faleminderit nga zemra gjithë ekipit të mrekullueshëm që e solli këtë film në jetë — aktorëve, bashkëpunëtorëve, miqve dhe çdo njeriu që dha zemrën në këtë projekt.

‘ERA’ po nis udhëtimin e saj ndërkombëtar dhe stacioni i parë është Brooklyn.

Premiera më 2 qershor 2025, ora 20:00! Na ndiqni — rrugëtimi sapo ka filluar!”**, ka shkruar Kelmendi në Instagram.

Ngjarja e filmit përcjell dramën e viteve të 90-ta në Kosovë, kur populli i Kosovës ballafaqohej me ndjekjet dhe largimet masive nga puna.

Përmes personazhit kryesor Era, trajtohet jo vetëm ngjarja, por edhe psikologjia dhe ndikimi i tjetërsimit të vlerave kulturore dhe njerëzore të asaj kohe.

Filmi u xhirua me mbështetjen e Qendrës Kinematografike të Kosovës dhe të Qendrës Kinematografike të Maqedonisë së Veriut.

Skenariste dhe regjisore është Parta Kelmendi, ndërsa producente e filmit është Afërdita Saraçini Kelmendi./21Media