Sezon i suksesshëm turistik në Ohër dhe Strugë! Hotelierët sërish u përballën me mungesë kuadri

Sezoni verorë më i suksesshëm në Ohër dhe Strugë. Kjo u tha në takimin e ministrit të Ekonomisë Kreshnik Bekteshi me hotelierët e Ohrit dhe Strugës.
Krahasuar me vitet e kaluara këtë vit ka pasur rritje prej 40% të turistëve të cilët kanë vizituar këto dy qytete turistike.

Ministri i Ekonomisë Kreshnik Bekteshi në takim me hotelierët njoftoi se sërish do të jap ndihmë për hotelierët e Ohrit dhe të Strugës nga 1 janari i vitit që vjen për përmirësimin e shërbimeve dhe rritjen e investimeve në kapacitete të reja hotelierike.

“Vetëm në pjesën e parë të këtij viti kemi rritje mbi 40% të turistëve të huaj në krahasim me vitin paraprak dhe në bazë të indikacioneve dhe të dhënave paraprakë ky trend i rritjes do të vazhdojë edhe gjatë muajve tjerë dhe pikërisht duke u bazuar në këto të dhëna dhe në rritjen e interesit për ta vizituar RMV-në Ministria e Ekonomisë sot dëgjoi edhe propozime konkrete dhe dha propozime ë cilat dalin nga sektori për ndihmën e drejtpërdrejtë që do ta ofrojmë”, tha Bekteshi.

Kryetari i HOTAM Kërste Blazheski tha se janë të kënaqur me sezonin veror, por potencoi sërish problemin me të cilin përballen hotelierët në këto dy qytete e ajo është mungesa e kuadrit, për këtë kërkuan ndihmë nga Ministria e Ekonomisë.

“Kuadër, këtë po e themi prej një kohe të gjatë, folëm edhe për këtë janë dhënë disa shembuj se si mundet disa mjete tu dedikohen kuadrit që ti mbajmë këtu, duhet të kujtojmë se viteve të kaluara tanimë punësojmë fëmijë nga 16-17 vjet të cilët kanë vullnet për punë por duhet ta arrijnë atë përvojë dhe kjo merr një deri dy vjet, të mos I lejojmë që edhe këta fëmijë të shkojnë në perëndim, janë dhënë disa propozime se sit i mbajmë këtu”, u shpreh Blazhevski.

Kapacitetet online për muajt shtator dhe tetor tanimë janë të rezervuara dhe thuajse të mbushura thonë hotelierët.