Rroga nuk mjafton për shportën e konsumit, qytetarët mbijetojnë me vështirësi

TË FUNDIT

Shpenzimet për jetesë po rriten ndërsa rrogat ulen, thonë qytetarët. Për sigurim të produkteve themelore për një muaj nevojiten të paktën 500 euro. Sipas tyre paratë që i marrin nuk mjaftojnë, e të mos flasim për luks ose pushime.

“Pa 500 euro mendoj se nuk është e mundur. Për shpenzime themelore, pa shpenzime të tjera, veshje, pushime etj…Ne jemi mësuar në një mënyrë të të jetuarit ndërsa tani kjo gjë u ndryshua dhe patjetër duhet të përmbahemi kushteve që i sjell periudha që vijon”, tha një qytetar.

“Nuk e kam planifikuar këtë. Menaxhon me atë që e ke. Të mbijetojmë por këtë e bëjmë me vështirësi. Pa 500 euro nuk mbijetohet muaji. Të paguash fatura, të sjellësh diçka për në shtëpi, të blesh veshje, të dalësh në kafene. Nevojitet më shumë. Asnjëherë nuk mjaftojnë paratë”, tha një qytetar.

Sipas qytetarëve ndër arsyet për problemet financiare me të cilat po ballafaqohen, krahas papunësisë dhe rritjes së çmimeve, problemi shtesë paraqet edhe pandemia me virusin korona. Këtë e konfirmoi edhe profesori universitar Nikolla Popovski në emisionin 10 Minuta në TV21.

“Shpenzimet e ulura, prodhimi i ulur sjellin tatime të ulura. Konsumatorët i ndryshuan shprehitë  e tyre të shpenzimit, do të thotë se tani shpenzojnë vetëm për atë që u nevojitet. Kjo do të thotë se njerëzit tani shpenzojnë më shumë për ushqim, për produktet e përditshme, madje janë racionalë duke krijuar rezerva për shkak se frikësohen që të mos e humbin vendin e punës, andaj i blejnë vetëm gjërat e nevojshme. Shpenzimet për gjërat themelore janë 5%, për ushqime, barna etj…”, deklaroi Nikolla Popovski, profesor universtar.

Paratë gjithmonë mungojnë thonë qytetarët që i anketuam, por sipas tyre standardi i ulët jetësor në shtet nuk është ndryshuar.