Tregu online shënon rritje në vend. Nga Asociacioni për e-tregti shpjegojnë se kjo është për shkak të mbylljes së kufijve dhe për shkak të vonesës së dërgesave të produkteve të huaja.
“Në gjysmën e parë të vitit 2020 qytetarët kanë shpenzuar 104,5 milionë euro online, përkatësisht për e –tregti ndaj tregtarëve të huaj dhe atyre të vendit. Maqedonasit shpenzojnë gjithnjë e më shumë ndaj tregtarëve të vendit. Këtë vit përqindja e mjeteve të shpenzuara online është rreth 70% ndaj tregtarëve të vendit”, tha Viktor Stojkovski – Sekretar i Përgjithshëm i Asociacionit për e-tregti.
Konsumatorët i ndryshuan shprehitë ndërsa e njëjta gjë po ndodh edhe me tregtarët, tha Stojkovski.
“E-tregtia po bëhet më atraktive. Për shkak të pandemisë, dhe orës policore njerëzit nuk mundeshin të dalin dhe të shkojnë në dyqan, madje edhe skeptikët më të mëdhenj filluan të blejnë online. Pas blerjes së parë online, kjo praktikë vazhdoi”, u shpreh Viktor Stojkovski – Sekretar i Përgjithshëm i Asociacionit për e-tregti.
Besojmë se edhe pas përfundimit të krizës me Kovid-19, shprehitë aktuale do të vazhdojnë me ritëm të shpejtë, tha Stojkovski. Nga ky Asociacion sugjerojnë edhe për një problem – frika e qytetarëve tanë dhe mosbesimi te blerja online.
“Qytetarët e Maqedonisë kishin frikë dhe mosbesim në lidhje me blerjen online, por pandemia i shtyu madje edhe skeptikët më të mëdhenj që ta shijojnë këtë përvojë….Është më e rëndësishme të provosh, pasi provon e di se nuk ka qëllime të pasinqerta përkatësisht se nuk mund të keqpërdoren të dhënat personale”, tha Viktor Stojkovski – Sekretar i Përgjithshëm i Asociacionit për e-tregti.
Për 6 muaj gjatë vitit 2020 numri i shitoreve online është rritur në 203. Nëse merret parasysh numri i shitoreve online për periudhën nga prilli deri në qershor të këtij viti, i njëjti është rritur për 145 shitore të reja, përkatësisht çdo ditë janë hapur nga 2 shitore online që është një dinamikë e shkëlqyeshme thanë nga Asociacioni.