Rast i ri mobingu në NQP Shkup! Punëtorja ankohet, Ndërmarrja shfajësohet

Rast tjetër mobingu në Ndërmarrjen për Qarkullim Publik. Elizabeta Toshevska punëtore në këtë ndërmarrje si kolegu I tij Mexhit Idrizi, ashtu edhe Toshevksa ankohet për mobing nga udhëheqësit e sektorit ku punon por edhe nga sektorë të tjerë në NQP. Toshevska thotë për TV21 se presioni ndaj saj ka filluar që kur ajo i ka paditur në gjyq për shkak se nuk i është paguar K15. E fituan gjyqin dhe nëpërmjet përmbaruesve mori K15 por që nga ai moment filloi mobingu ndaj saj.

“Dhe kur morëm K15, mua më degraduan, më ulën në një vend më të ulët pune si ndjekës i Qendrës së trafikut, mi kanë ulur pikët përkatësisht të ardhurat personale dhe kjo zgjat.  Çdo ditë kemi ngacmime në kuptimin ke kujdes çfarë bën, nuk je në të drejtë, ende do të padisësh dhe gjëra të tjera”, tha Elizabeta Toshevska, punëtore në NQP.

Ajo thotë se për ankesat e saj ka kërkuar disa herë kërkesë me shkrim për takim më drejtorin gjeneral të Ndërmarrjes por ai është i pakapshëm për punëtorët thotë Toshevska.

 “Drejtori gjeneral është i pakapshëm, 3 vite lutem të hy në takim por nuk ka shansa. Është i pakapshëm si për mua ashtu edhe për Mexhitin dhe për gjithë të tjerët që nuk ju shkojnë për qefi”, u shpreh Elizabeta Toshevska, punëtore në NQP.

Edhe pse edhe TV21 kërkoi deklaratë nga drejtori i këtij institucioni, përgjigje morëm me shkrim nëpërmjet zëdhënëses së institucionit. NQP i vlerëson si të pabaza ankesat e punëtores së tyre.

 “NQP vlerëson se kolegia akuzon pabazë se për shkak të kërkesës së saj për K15 dhe padisë, është në vend pune më të ulët, merr pagë më të  ulët dhe njëkohësisht së I bëhet mobing. Ankesa për mobing i është e pa bazë për shkak se asaj i është theksuar se atë që ajo e konsideron si mobing nuk është e shkruar në Ligjin për shqetësim në vendin e punës”, thonë nga Ndërmarrja e Qarkullimit Publik.

Kurse për takim me drejtorin gjeneral, nga NQP thonë se Toshevska nuk ka dorëzuar asnjëherë kërkesë me shkrim për takim ndërsa kjo e fundit thotë se do t’i padisë për mobing.