Qeveria do të menaxhojë me Klinikat private! A do të paguajnë pacientët më pak për t’u trajtuar nga Covid-19?

Pas shpalljes së gjendjes krize për shkak të përkeqësimit të situatës me Covid-19, në dispozicion do të vendosen edhe kapacitetet e spitaleve private dhe poliklinikave, si dhe stafi i tyre mjekësor. Presidenti Stevo Pendarovski, thotë se kjo do të thotë se Qeveria mund të menaxhojë me institucionet private shëndetësore në drejtim të ballafaqimit me pandeminë.  

“Këtu nuk bëhet fjalë për nacionalizim të spitaleve private, por për menaxhimin e tyre në luftën kundër pandemisë, për çka Qeveria do të vlerësojë ku është e nevojshme. Ndryshe, e dini se prona private është e garantuar me Kushtetutë dhe këtu nuk bëhet fjalë për nacionalizim apo ndryshim të pronë”, deklaroi Stevo Pendarovski, president.

Pendarovski shton se për të gjitha shërbimet që do t’i japin institucionet private shëndetësore, do të marrin dëmshpërblim, respektivisht kompensim i cili nuk mund të jetë më i lartë se 30% nga vlera e tregut. Nga ana tjetër, ministri Filipçe, thotë se po e shqyrtojnë mundësinë ligjore për shfrytëzim të kapacitetit privat.

“Me këtë vendim u ngritën edhe çështje të tjera… Tani nuk mund të përgjigjem sepse për herë të parë jemi në situatë të tillë. Që sot do të caktojmë takime me ekipet tona juridike dhe do t’i analizojmë ligjet. Më të rëndësishme janë kapacitetet, shtretërit dhe mjekët që duhet kyçur në këtë luftë”, pohoi Venko Filipçe, ministër i Shëndetësisë.

Ndryshe, kryeministri Zoran Zaev në emisionin “Klik Plus”, tha se qytetarët para se të vendosin të shkojnë në ndonjë klinikë private, duhet të kontrollojnë çka ka dhe çka ofron sistemi shtetëror. Ai porositi se nëse dikush ka tepër para, mund të drejtohet në klinikë private, por se të njëjtin shërbim mund ta marrin edhe në spitalet shtetërore.

“Nëse dikush ka tepër para, le të shkojë, këto janë kompani të licencuara, institucione shëndetësore të cilat, normal, punojnë për përfitim. Ne si shtet nuk punojmë për përfitim. Transplantim të gjakut ka edhe në Klinikën Infektive, remdesivir ka edhe në Klinikën Infektive dhe jepet sipas shabllonit të OBSH-së”, tha Zoran Zaev, kryeministër.

Rreth 200 euro kushton një ditë për t’u trajtuar në spital për një pacient me Covid-19, kurse një i sëmurë i cili trajtohet me respirator për mbi 4 ditë, shtetit i kushton 5.700 euro. Ky çmim është sipas çmimores aktuale dhe vlen për rastet me koronavirus. Në spitalet private trajtimi me transplantim të gjakut kushton mbi 12 mijë euro. Kërkuam qëndrim edhe nga klinikat private lidhur me atë si do të veprojnë kur Qeveria do të menaxhojë me resurset e tyre dhe sa janë të gatshme, por deri në fillim të këtij edicioni të lajmeve, nuk morëm përgjigje.