Punimet nisin para zgjedhjeve, më pas ndërpriten! Bulevardi “V.S. Bato” në Tetovë ka mbetur në gjysmë

Me 13 shkurt të këtij viti kryetarja e komunës së Tetovës, Teuta Arifi,  bashkë me zv/ministren e financave Shyrete Elezin, përuruan nisjen e punimeve në bulevardin “Vidoe Smilevski-Bato”.

Projekti  në bazë të tabelës është nga viti 2016, ndërsa u përurua një muaj para zgjedhjeve, të cilat duhej të mbaheshin më 12 prill.

Gazetari: Projekti është nga viti 2016! Kur janë siguruar mjetet nga Banka botërore?

“Banka botërore ka strategji dhe kjo ka të bëjë me strategjinë paraprake,  e cila ka qenë në periudhën 2016 –2019 dhe domethënë mjetet janë siguruar në këtë periudhë,” tha Shyrete Elezi, zv/ministre Financave.

Gazetari: E shohim se projekti është nga viti 2016, keni thënë se mjetet janë siguruar para dy viteve, pse pikërisht para zgjedhjeve e promovoni?

“Banka Botërore që atëherë ka bërë projektimet  statike dhe ne kemi shprehur interesin tonë,” tha Teuta Arifi, kryetare Tetovës.

Por pas tre muajsh situata në këtë bulevard është si në pamjet që shihni, punët janë ndërprerë, ndërsa edhe tabela është në tokë.  Televizioni 21 jozyrtarisht mëson se komuna do të duhet të përpilojë projekt tjetër, pasi nuk është paraparë dalje për një objekt të një Kontrolli teknik.

E nga komuna e Tetovës thonë se punët do nisin të shtunën më 13 qershor.

“Sa u përket punëve ndërtimore rreth vazhdimit te bulevardit Industrial ne Tetove,  iu informojmë se shkaku i restrikcioneve si pasojë e pandemisë së Covid-19, punët përkohësisht u pezulluan, por të njëjtat do të fillojnë ditën e shtunë 13.06.2020, kurse kompania e cila kryen punët ndërtimore na ka siguruar se nuk do të ketë vonesa në afatin e paraparë me kontratën e punës për finalizimin e punëve, dhe të njëjtat do të mbarojnë deri ne janar te vitit 2021,” u tha nga Komuna e Tetovës.

 Por  ky nuk është projekti i vetëm në Tetovë që ka filluar dhe është lënë në gjysmë. Disa herë janë përuruar punët  në bulevardin “Bllagoja Toska” si dhe hapjen e bulevardit në  rrugës afër kazermës së Tetovës.  Gjatë ditëve në vazhdim pritet të përurohen edhe punët në shkollën fillore në Reçicë të Vogël që u premtua kohë më parë nga ministri arsimit Arber Ademi.