Hotelierët dhe objektet e tjera hotelierike paralajmëruan se për dy javë vullnetarisht do t’i mbyllin objektet e tyre pas masave të reja të vendosura mbrëmë nga Qeveria. Nga Oda e Pavarur e Hotelierëve thonë se pa asnjë konsultim me hotelierët dhe pjesëmarrësit e tjerë në këtë sektor Komisioni për Sëmundje Infektive ka vendosur kokë më vete për masat e reja.
“Nuk na duhen protokolle të arrnuara, vullnetarisht do t’i mbyllim objektet për dy javë. Por, çka nëse numrat e KOVID edhe më tutje rriten? A do të kenë Filipçe dhe Karaxhovski trimëri dhe guxim t’iu kërkojnë falje hotelierëve, ta kompensojnë dëmin dhe publikisht të pranojnë se objektet hotelierike nuk janë shkak për infeksion por arsyetim për shmangien e përgjegjësisë për masat e gabuara dhe rekomandimet e përgjithshme për parandalimin e përhapjes së virusit korona”, tha Zdravko Josifovski nga Oda e Pavarur e Hotelierëve.
E menjëherë reaguan nga Komisioni për Sëmundje Infektive . Nga atje thonë se rekomandimet për masat e reja, tërësisht bazohen ndaj analizës së gjendjes epidemiologjike dhe anketave epidemiologjike nga të infektuarit e rinj me Kovid-19.
“Komisioni për Sëmundje Ngjitëse është i befasuar nga sulmet dhe kualifikimet ndaj tij nga Oda e Pavarur e Hotielerisë duke pasur parasysh atë që Komisioni në përgatitjen e të gjithë protokolleve deri më tani në mënyrë aktive komunikoi me të gjithë faktorët, përfshirë edhe hotelierët. Protokollet janë në fuqi tashmë disa muaj dhe oda deri më tani nuk kishte problem me të njëjtat, përkundrazi e përshëndeti dhe u pajtuan me miratimin e tyre”, thonë nga Komisioni për Sëmundje Infektive.
Ndryshe, mbrëmë Qeveria vendosi që të mos organizohen mbrëmje me këngëtarë dhe Dj, të gjithë lokalet të jenë hapur deri në ora 22, të mos punojnë fare disko klubet, të zvogëlohet numri i personave në një tavolinë, nga 12 në 4.
Nga Komisioni theksojnë se transmisioni i virusit ndodh më së shumti ndërmjet qytetarëve të moshës prej 20 deri 40 vjet, ndërsa anketat epidemiologjike tregojnë se shkaku shpesh është mosrespektimi i masave për grupim ose vizitë të ngjarjeve dhe ahengjeve.