Presidenti i sapozgjedhur Xho Bajden këto ditë do t’i publikojë emrat e disa zyrtarëve të rëndësishëm në kabinetin e tij të angazhuar me politikën e jashtme dhe sigurinë, njoftoi mbrëmë Politiko.
Duke cituar burime të njohura me shpërndarjen e detyrave, edicioni njofton se pozicionet e rëndësishme do t’u përkasin emrave të njohur që nga koha e administrimit të presidentit Barak Obama.
Sipas korrespondentit të MIA-s nga Uashingtoni, pozicionin e ndihmës sekretarit të shtetit në krye të çështjeve politike do ta marrë Viktoria Nuland, e cila gjatë presidencës së Obamës ishte nënsekretare e ngarkuar për Evropën dhe Euroazinë. Nuland luajti rol kryesor në formësimin e politikës së SHBA ndaj Evropës. Ekspertët thonë se me kthimin e saj në Departamentin e shtetit, Uashingtoni u ka dhënë rëndësi marrëdhënieve me Evropën dhe aleatët e saj, të cilat janë lëkundur gjatë katër viteve të fundit nga politikat egocentrike të presidentit të tanishëm Donald Tramp.
Nuland gjithashtu udhëhoqi një linjë të fortë drejt Rusisë dhe mbështeti forcat pro-perëndimore në Ukrainë, Gjeorgjinë dhe Moldavi. Në Maqedoninë e Veriut, ajo është e njohur për pjesëmarrjen e saj në Marrëveshjet Përzhinos në vitin 2015, për formimin e një qeverie të koalicionit të gjerë.
Bartësit e tjerë të funksioneve që Politiko zbulon janë Vendi Sherman dhe Xhon Fajner. Sherman do të zëvendësojë kandidatin e detyrës sekretar i shtetit Toni Blinken. Gjatë presidencës së Obamës, ai ishte nënsekretar i shtetit për çështjet politike dhe negociuese kryesore në marrëveshjen bërthamore me Iranin.
Fajner, ndërkohë, do të jetë zëvendës këshilltari i sigurimit kombëtar të Bajdenit. Fajner është ish-gazetar që shërbeu në disa poste gjatë presidencës së Obamës, më i larti prej të cilëve ishte shkrimtar i fjalimeve të politikës së jashtme dhe këshilltar i Blinken, atëherë zëvendës këshilltar i sigurisë kombëtare.