Presioni ndaj Gianni Infantinos po rritet.
Kryeministri britanik Andy Burnham ka deklaruar të dielën se presidenti i FIFA-s nuk është njeriu i duhur për të udhëhequr futbollin botëror, pas skandalit me planin për t’ua shitur aksionet e Botërorit investitorëve privatë.
“Nuk besoj se ai është njeriu i duhur për ta çuar futbollin përpara në skenën botërore. Plani që u paraqit ishte ofendues për shumë njerëz të futbollit në mbarë botën dhe nuk mund të ndodhë që thjesht të vazhdojmë dhe ta harrojmë, nuk ishte i pranueshëm,” – tha Burnham.
Deklarata vjen një ditë pasi UEFA njoftoi se ka humbur besimin në lidershipin e FIFA-s, ndërsa CONCACAF tha se drejtuesit e FIFA-s “nuk e vënë më futbollin në vend të parë“.
Infantino u detyrua të tërhiqet nga plani kontrovers për të shitur profitet e Kupës së Botës përmes një filiali komercial, pasi 55 shtetet anëtare të UEFA-s u pajtuan të enjten për të bojkotuar Botërorin dhe të gjitha garat e tjera të FIFA-s.
Kundër planit dolën edhe CONCACAF dhe Konfederata Aziatike.
Pavarësisht tërheqjes, UEFA ka paralajmëruar se do të punojë me konfederatat e tjera për të hartuar një plan që një gjë e tillë “të mos ndodhë më kurrë”.
E ardhmja e Infantino-s tani vihet në pikëpyetje. Zgjedhjet e ardhshme presidenciale të FIFA-s mbahen në mars në Rabat të Marokut, ndërsa afati për kandidatura është 18 nëntori.