Përleshja vdekjeprurëse në Tetovë, MPB: Janë arrestuar tre persona

Nga Ministria e Punëve të Brendshme njoftojnë se janë arrestuar tre persona në lidhje me përleshjen e djeshme me armë në kryqëzimin e rrugëve „Ilinden“ dhe „Bllagoja Toska“ në Tetovë, ku mbeti i vrarë një person dhe gjashtë të tjerë u lënduan, përfshirë një të mitur dhe një këmbësor, përcjell TV21. Nga MPB thonë se hetimet po vazhdojnë deri në zbardhjen e plotë të rastit.

“Në lidhje me përleshjen e armatosur gjatë ditës së djeshme në Tetovë, ju njoftojmë se janë ndaluar tre persona. Gjatë kontrollit në disa lokacione në fshatin Gajre të Tetovës, janë gjetur objekte që janë me interes të hetimit. Po ndërmerren masa dhe aktivitete për zbardhjen e plotë të rastit dhe gjetjen e objekteve dhe personave të tjerë që kanë qenë të përfshirë në përleshje”, thonë nga MPB për TV21.