Tërheqje për veshi, shuplakë dhe ngritje në ajër. Janë këto pamje shqetësuese që vërshuan sot nëpër rrjetet sociale.
Fëmija ndaj të cilit është ushtruar dhunë është nxënës i klasës së 7-të, ndërsa mësimdhënësi që e ka goditur është arsimtar i gjuhës angleze. Ngjarja ka ndodhur dje pasdite, në shkollën fillore “Panajot Ginovski” në Butel.
Rastin e tillë, drejtoresha e shkollës, Qamurane Rexha menjëherë dje e ka paraqitur në polici. Thotë se pamjet e tilla shqetësuese edhe ajo i ka parë në videon që ia kanë dërguar kolegët. Por se si ka ndodhur rasti dhe përse ka ardhur deri tek dhuna, drejtoresha nuk ka informacione.
“Nuk e di si ka ndodhur rasti. Në ora 16.30, kur u ktheva prej pune, kolegët ma dërguan videon. Nga videoja e njoha arsimtarin, u shqetësova shumë, menjëherë ndërmora masat dhe rastin e paraqita në polici. Ende jam shumë e shqetësuar”.
Drejtoresha është e re në postin e drejtorit, ndërsa arsimtari tani e disa vite vepron në atë shkollë. Pyetëm drejtoreshën Rexha se çka do të ndodhë tani e tutje me arsimtarin dhe se a do të shkarkohet nga puna?
“Drejtoresha e shkollës na tha që në asnjë mënyrë nuk do të tolerojë dhunë në shkollën që ajo e drejton. Punën e parë që ajo do ta bëj të hënën është të thirre Komisionin disiplinor dhe do të veprojnë sipas asaj që e thotë ligji”, raporton gazetarja e TV21, Valmira Zendeli.
Nga MPB konfirmuan rastin, ndërsa shtuan se po presin denoncim zyrtarë nga drejtoresha e shkollës me çka menjëherë do të ndërmarrin masa mbi rastin. Sipas ligjit për arsim fillorë, çdo punonjës i shkollës është i detyruar të kujdeset për interesin më të mirë të nxënësit dhe të respektojë dinjitetin e tij/saj, si dhe Konventën për të Drejtat e Fëmijës. Është e ndaluar abuzimi fizik, psikologjik dhe seksual, e ndaluar është ndëshkimi i nxënësit dhe trajtimi poshtërues ndaj tij.