Pas tetë vitesh, Maqedonia ka miratuar strategjinë kombëtare për zhvillimin e teknologjisë së informacionit dhe komunikimit (TIK), e njohur si SMART/MK2030, e cila paraqet udhërrëfyesin se si shteti do ta realizojë të ardhmen digjitale. Ky është një dokument nacional i harmonizuar me Dekadën Digjitale Evropiane dhe Agjendën e Zhvillimit, përcjell TV21. Strategjia bazohet në katër shtylla kryesore: infrastruktura e TIK-ut, kompetencat digjitale – me synimin që deri në vitin 2030 të paktën 70% e popullsisë të ketë aftësi digjitale, qeverisja elektronike dhe shërbimet publike, si dhe inteligjenca artificiale si shtylla e katërt.

“Si vend kandidat, Maqedonia pranon kornizën e Dekadës Digjitale Evropiane, e cila parasheh katër objektiva deri në vitin 2030: qytetarë të trajnuar digjitalisht dhe ekspertë të kualifikuar të TIK-ut, infrastrukturë të sigurt dhe të lidhur, shërbime publike të digjitalizuara dhe biznese të integruara digjitalisht. Strategjia jonë ndjek drejtpërdrejt këto prioritete evropiane, forcon konvergjencën institucionale me vendet anëtare, krijon mundësi për pjesëmarrje në programet digjitale evropiane dhe mundëson qasje në instrumente financiare dhe ndihmë teknike nga BE-ja”, tha Stefan Andonovski – Ministër për Transformim Digjital.

Të dielën, në raundin e parë të Zgjedhjeve Lokale, zyra e Avokatit të Popullit do ta aktivizojë linjën telefonike falas 0800-54321, në të cilën qytetarët nga ora 7 deri në 19 do të mund të raportojnë shkelje të të drejtës zgjedhore, përcjell TV21. Raportimet mund të bëhen edhe personalisht në të gjitha shtatë zyrat e Avokatit të Popullit – në Shkup, Manastir, Kërçovë, Kumanovë, Strumicë, Tetovë dhe Shtip, si edhe në numrat lokalë të telefonit të publikuar për çdo qytet.

Nga institucioni informojnë se do të ndërmerren masa urgjente për mbrojtjen e të drejtave të votuesve, ndërsa kujtojnë se e drejta e votës është e garantuar me Kushtetutë dhe se çdo shkelje e saj përbën vepër të dënueshme. Avokati i Popullit apelon që të gjithë pjesëmarrësit në procesin zgjedhor të veprojnë me përgjegjësi dhe të respektojnë protokollet shëndetësore gjatë votimit./tv21.tv

Bashkimi Evropian ka miratuar lëshimin e dytë të mjeteve për Maqedoninë e Veriut në kuadër të Instrumentit për Reforma dhe Rritje për Ballkanin Perëndimor, në vlerë totale prej 16 milionë eurosh, përcjell TV21. Shuma përfshin grante të pakthyeshme dhe hua, nga të cilat 7,4 milionë euro do të paguhen direkt në buxhetin shtetëror, ndërsa pjesa tjetër do të shfrytëzohet për projekte infrastrukturore përmes Kornizës së Investimeve për Ballkanin Perëndimor (WBIF).

Vendimi vjen pas vlerësimit pozitiv të Komisionit Evropian për reformat e Qeverisë, duke përfshirë progresin në digjitalizim, sigurinë kibernetike, dokumentet elektronike dhe luftën kundër ekonomisë joformale. Për hapat që nuk janë përmbushur plotësisht, Komisioni ka caktuar një periudhë shtesë deri në qershor 2026.

Ministri i Shëndetësisë, Azir Aliu vizitoi repartin e epidemiologjisë në Gostivar, ku gjithashtu mori vaksinën kundër gripit sezonal.

“Sot ndodhem në Gostivarin tim të lindjes dhe përmes shembullit personal dua të theksoj rëndësinë e vaksinimit në kohë, si masë më efektive parandaluese për mbrojtjen e shëndetit. Apeloj qytetarët, veçanërisht ata që bëjnë pjesë në grupet e rrezikut, të vaksinohen përmes aplikacionit vakcinacija.mk ose tek mjeku i tyre amë,” tha ministri gjatë vizitës.

Në nivel shtetëror, deri më tani janë paraqitur rreth 49 mijë qytetarë për vaksinim kundër gripit sezonal, ndërsa vetëm në ditën e parë janë vaksinuar mbi dy mijë persona.

“Ky interes i madh tregon vetëdije për rëndësinë e mbrojtjes nga gripi dhe konfirmon nevojën e kësaj mase parandaluese. Këtë vit, Ministria ka siguruar numrin më të madh të vaksinave kundër gripit sezonal – 80 mijë doza të vaksinës katërvalente nga prodhuesi i njohur ‘Abot’ nga Holanda,” shtoi Aliu.

Vaksinimi falas përfshin grupet e rrezikut: personat mbi 65 vjeç, ata me sëmundje kronike, punonjësit shëndetësorë, gratë shtatzëna, fëmijët nga 6 muaj deri në 5 vjeç, si dhe banorët dhe punonjësit e institucioneve sociale për të moshuar.