Aksion i gjere i MPB-së kundër drogës, në pranga 13 persona nga 18 deri në 46 vjeç

0

Ministria e Punëve të Brendshme njofton se gjatë datave 30 dhe 31 tetor 2026, në disa qytete të vendit janë arrestuar 13 persona të moshës 18 deri në 46 vjeç, nën dyshimin për posedim të lëndëve narkotike. Arrestimet janë realizuar në Shkup, Prilep, Demir Kapi, Bogovinë dhe Shtip. Gjatë kontrolleve, te personat janë gjetur dhe sekuestruar marihuanë, substanca pluhurore dhe kokërrzore të bardha, tableta, si dhe sende me përmbajtje pluhurore. Nga MPB bëjnë të ditur se në Shkup janë arrestuar nëntë persona, ndërsa rastet e tjera janë evidentuar në Burgun e Prilepit, Bogovinë, Demir Kapi dhe Shtip. Pas dokumentimit të plotë të rasteve, ndaj personave të përfshirë do të parashtrohen kallëzime përkatëse.

Protestuesit në Tiranë hedhin molotov, policia përgjigjet me gaz lotsjellës dhe ujë

0

Përplasjet mes protestuesve dhe policisë në Tiranë janë intensifikuar, pasi protestuesit kanë hedhur breshëri bombash molotov në drejtim të efektivëve.

Forcat e rendit u janë përgjigjur me gaz lotsjellës dhe autobotin e ujit, në përpjekje për të shpërndarë turmën.

Situata në zonë vijon të jetë e tensionuar.

Dimitrievski: Përderisa ZNAM është në Qeveri, provimi i jurisprudencës do të mbahet në gjuhën maqedonase

0

Kryetari i Lëvizjes ZNAM, Maksim Dimitrievski, ka deklaruar se përderisa partia e tij është pjesë e Qeverisë, provimi i jurisprudencës do të mbahet në gjuhën maqedonase, në përputhje me Kushtetutën dhe ligjet.

Deklaratën e bëri sot në Koçan, ku së bashku me udhëheqësinë e partisë prezantoi rezultatet e punës dyvjeçare të ZNAM-it, në kuadër të takimeve me qytetarët.

Duke komentuar kërkesat dhe debatet e fundit lidhur me dhënien e provimit të jurisprudencës, Dimitrievski tha se qëndrimi i partisë është i qartë dhe nuk do të ndryshojë.

“Përderisa ZNAM është pjesë e Qeverisë, provimi i jurisprudencës do të jepet në përputhje me ligjin dhe Kushtetutën, në gjuhën maqedonase. Mund të ketë kërkesa, presione dhe spekulime të ndryshme, por qëndrimi ynë është i qartë. Këto janë vijat tona të kuqe dhe nuk do të tërhiqemi prej tyre”, deklaroi Dimitrievski.

Ai shtoi se për parimet që përfaqëson partia e tij nuk pranon kompromise që bien ndesh me Kushtetutën dhe ligjet.

Klekovski dhe Memishoglu nënshkruan memorandum bashkëpunimi në shëndetësi mes Maqedonisë dhe Turqisë

0

Ministri i Shëndetësisë, Sasho Klekovski, mbrëmë, në margjinat e Kongresit të 12-të Botëror të Mjekësisë Turke në Stamboll, zhvilloi një takim bilateral me ministrin e Shëndetësisë së Republikës së Turqisë, prof. dr. Kemal Memishoglu.

Nga Ministria e Shëndetësisë njoftojnë se gjatë takimit u shqyrtuan marrëdhëniet bilaterale dhe u theksua miqësia mes dy shteteve.

Pas takimit, të dy ministrat nënshkruan një memorandum mirëkuptimi dhe bashkëpunimi në fushën e shëndetësisë, i cili do të shërbejë si bazë për aktivitete konkrete të përbashkëta mes dy ministrive dhe institucioneve të tyre shëndetësore. Në konkretizimin e bashkëpunimit do të përfshihet edhe agjencia shtetërore turke për shërbime ndërkombëtare shëndetësore, USHAŞ.

Si fusha të bashkëpunimit të ardhshëm, ministri Klekovski veçoi shëndetësinë digjitale, shkëmbimin profesional dhe edukimin e specialistëve, si dhe bashkëpunimin në fushën e barnave dhe vaksinave.

“Turqia është mike e sinqertë e Maqedonisë dhe këtë e dëshmoi edhe në momentet më të vështira, pas tragjedisë në Koçan. Memorandumi na jep një kornizë për t’i shndërruar marrëdhëniet e mira në projekte konkrete – nga shëndetësia digjitale, përmes edukimit të specialistëve, deri te barnat dhe vaksinat”, deklaroi Klekovski.

Ai gjithashtu falënderoi Republikën e Turqisë për ndihmën dhe solidaritetin e treguar pas tragjedisë në Koçan.

Shasivari paralajmëron digjitalizimin e procedurave noteriale dhe ndryshime në legjislacion

0

Përmirësimi i legjislacionit në fushën e noterisë, harmonizimi i tij me standardet bashkëkohore dhe digjitalizimi i procedurave dhe shërbimeve janë disa nga ndryshimet që paralajmëroi sot ministri i Drejtësisë, Jeton Shasivari.

Ai i bëri këto deklarata në hapjen e manifestimit “Ditët e Noterisë 2026”, të organizuar nga Oda e Noterëve.

Duke folur për temën “Trajtimi i trashëgimisë: mes kornizës ligjore dhe praktikës noteriale”, Shasivari theksoi se digjitalizimi duhet të mundësojë procedura më të shpejta, më pak pengesa administrative, shpenzime më të ulëta, transparencë më të madhe dhe qasje më të lehtë të qytetarëve në shërbimet juridike.

Ai theksoi rëndësinë e noterisë si një nga shtyllat e sistemit juridik dhe garantues i sigurisë juridike të qytetarëve, duke vënë në dukje se puna e noterëve ndikon drejtpërdrejt në mbrojtjen e të drejtave pronësore, marrëdhënieve familjare dhe sigurisë së transaksioneve juridike.

Sipas Shasivarit, besimi i qytetarëve është kapitali më i madh i institucioneve, ndërsa profesioni i noterit, përveç ekspertizës juridike, kërkon integritet, pavarësi, etikë profesionale dhe nivel të lartë përgjegjësie.

Ministri bëri të ditur se Ministria e Drejtësisë, në kuadër të reformave të ardhshme dhe procesit të integrimit evropian, do t’i kushtojë vëmendje të veçantë përmirësimit të legjislacionit në këtë fushë.

Ai theksoi se Oda e Noterëve do të jetë partnere e rëndësishme dhe e barabartë e Ministrisë në këtë proces, pasi reformat e qëndrueshme nuk realizohen vetëm përmes ndryshimeve ligjore, por edhe përmes bashkëpunimit të ngushtë me profesionistët që i zbatojnë ligjet çdo ditë në praktikë.

Shasivari shprehu shpresën se “Ditët e Noterisë 2026” do të mundësojnë diskutime përmbajtjesore, shkëmbim përvojash dhe propozime konkrete për zhvillimin dhe avancimin e mëtejshëm të noterisë në vend.

“Siguria juridike e ndërton besimin, profesionalizmi e mbron atë, ndërsa përgjegjësia e bën drejtësinë të prekshme për çdo qytetar”, theksoi ministri Shasivari.

Banka Popullore: Heqja e licencës së Alta Bankës në Serbi nuk nënkupton automatikisht heqjen e licencës së kësaj banke në Maqedoni

0

Banka Popullore e Maqedonisë së Veriut sqaron se vendimi i Bankës Popullore të Serbisë për revokimin e licencës së punës së Alta Bankës në Beograd nuk nënkupton automatikisht revokimin e licencës së Alta Bankës SHA Manastir, përcjell TV21. Nga Banka Popullore theksojnë se vendimi i autoriteteve serbe ka të bëjë vetëm me veprimtarinë e bankës në Serbi, ndërsa banka në Maqedoninë e Veriut është person juridik i pavarur, i themeluar dhe i regjistruar sipas legjislacionit vendor.

“Banka vendore është person juridik i pavarur, i themeluar dhe i regjistruar në Republikën e Maqedonisë së Veriut, veprimtaria e së cilës vlerësohet në përputhje me kornizën ligjore dhe rregullatore vendore”, thuhet në njoftimin e Bankës Popullore.

Institucioni thekson se po e ndjek nga afër situatën dhe të gjitha rrethanat që mund të ndikojnë në funksionimin e bankës, përfshirë edhe rreziqet që burojnë nga lidhjet e saj pronësore.

“Banka Popullore, si mbikëqyrëse kompetente, e ndjek gjendjen dhe vepron në përputhje me dispozitat ligjore”, thuhet më tej në njoftim.

Nga Banka Popullore sqarojnë gjithashtu se marrja e pjesëmarrjes së kualifikuar në një bankë bëhet përmes një procedure gjithëpërfshirëse, gjatë së cilës vlerësohen kriteret e përcaktuara me ligj, bazuar në të dhënat zyrtarisht të disponueshme.

Në fund, institucioni u bën thirrje qytetarëve që të mbështeten në informacione zyrtare dhe të verifikuara, duke shmangur përfundimet e bazuara në pretendime të pakonfirmuara dhe spekulime.

“Banka Popullore do të vazhdojë ta ndjekë me kujdes gjendjen dhe të veprojë në mënyrë të pavarur, profesionale dhe ekskluzivisht në përputhje me kompetencat e saj ligjore, në interes të sigurisë së sistemit bankar dhe mbrojtjes së depozituesve”, përfundon njoftimi.

Studentët në Tiranë refuzojnë përfshirjen e PD-së në protestë

0

Në Tiranë po mbahet protesta kombëtare e thirrur nga studentët dhe Partia Demokratike, me kërkesë për dorëheqjen e kryeministrit Edi Rama. Studentët, pedagogët dhe mbështetësit e opozitës janë mbledhur fillimisht para Kryeministrisë, prej nga më pas janë nisur drejt Ministrisë së Arsimit. Në krye të marshimit ishin deputetët demokratë, ndërsa Sali Berisha nuk mori pjesë. Gjatë protestës pati tensione dhe përplasje verbale, përfshirë thirrjet kundër Ramës dhe Berishës. Studentët refuzuan protestuesit e Partisë Demokratike.

Erjon Vishkulli përballet me një sfidë të re shëndetësore, kërkon lutje dhe falënderon shqiptarët për mbështetjen

0

Erjon Vishkulli ka ndarë një mesazh emocional në rrjetet sociale, ku ka falënderuar të gjithë ata që i kanë qëndruar pranë në një periudhë të vështirë të jetës së tij.

Ai bëri të ditur se, pas një dhimbjeje të madhe, tani po përballet edhe me një sfidë tjetër shëndetësore që lidhet me shikimin e njërit sy.

Në mesazhin e tij, Vishkulli shpreh mirënjohje për miqtë, familjarët dhe shqiptarët nga vende të ndryshme të botës, të cilët e kanë mbështetur përmes telefonatave, mesazheve, fjalëve të ngrohta dhe lutjeve.

„Në një moment kur zemra ka nevojë për mbështetje, ju më treguat se nuk jam vetëm. Solidariteti, dashuria dhe respekti që më keni dhuruar kanë një vlerë të jashtëzakonshme për mua”, shkruan ai.

Vishkulli shpreh shpresën që edhe këtë sfidë ta kalojë me sukses, ndërsa falënderimin e tij e përmbyll me një mesazh besimi dhe mirënjohjeje:

„Dhe mbi të gjitha, falënderoj Zotin për forcën, për jetën dhe për shpresën që më jep çdo ditë. Zoti ju shpërbleftë secilin për dashurinë dhe mbështetjen tuaj! Mirënjohje pafund, u shtofshin shqiptarët e mirë”.

Ai nuk ka dhënë detaje të tjera lidhur me gjendjen e tij shëndetësore.

Avokati nga Beogradi: Vuçiqi mund të përfundojë në pranga

0

Lista Studentore, e cila ka fituar zgjedhjet në Serbi, e ka shtyrë përkohësisht krijimin e shumicës parlamentare dhe formimin e qeverisë së re.

Megjithatë, përfaqësuesit e saj kanë deklaruar se nuk do të heqin dorë nga kërkesa për ndjekjen urgjente penale të figurave kryesore të pushtetit të ish-presidentit Aleksandar Vuçiq.

Duke komentuar situatën paszgjedhore për televizionin kroat HRT, avokati nga Beogradi, Çedomir Stojkoviq, deklaroi se ndjekje të tilla nuk do të mund të ndodhnin nëse Serbia do të ishte anëtare e Bashkimit Evropian.

Stojkoviq, i cili gjatë pushtetit të mëparshëm ishte ndaluar nën akuzat për përmbysjen e rendit kushtetues për shkak të publikimeve të tij në rrjetet sociale, kujtoi gjithashtu se më herët kishte ngritur kallëzim penal kundër Aleksandar Vuçiqit për rolin e pretenduar në vrasjen e civilëve me pushkë snajper gjatë luftës në Sarajevë, në rastin e njohur si “Safari i Sarajevës”. Për këtë arsye, ai ishte arrestuar.

Sipas Stojkoviqit, kërkesat për ndalimin e pjesëtarëve të regjimit të deritanishëm janë plotësisht të justifikuara, tani që frika në shoqëri është zbehur.

Ai pretendon se në Serbi po zhvillohet një përpjekje për të fshehur abuzimet financiare dhe shkeljet ligjore që kanë ndodhur ndër vite.

“Kemi parë vepra të dukshme penale para kamerave, duke filluar nga televizioni Informer, i cili përvetësonte para publike për t’i quajtur qytetarët fundërrina, e deri te policët që rrihnin gra dhe fëmijë në rrugë. Kemi jetuar nën një tirani që fshihej pas errësirës mediatike”, deklaroi Stojkoviq për HRT-në.

Ai shtoi se pret që shumë zyrtarë të lartë të Partisë Përparimtare Serbe (SNS) të përfundojnë në gjykatë për pasurim të paligjshëm.

Duke folur për të ardhmen politike të ish-presidentit serb, Stojkoviq pretendoi se ndikimi i Vuçiqit është zhdukur në mënyrë të pakthyeshme dhe se ai tashmë është margjinalizuar politikisht.

I vodhën pistoletën “Glock” në Çair, 74-vjeçari denoncon rastin në Polici

0

Një burrë 74-vjeçar nga Shkupi ka denoncuar në polici se i është vjedhur një pistoletë e markës “Glock” nga automjeti i tij transportues, në zonën e komunës së Çairit.

Sipas njoftimit të Ministrisë së Punëve të Brendshme, vjedhja dyshohet të ketë ndodhur më 25 tetor, rreth orës 03:30 të mëngjesit. Pronari e ka raportuar rastin më 30 tetor, në orën 20:30, në SPB Shkup.

Ajo që bie në sy në këtë rast është se automjeti transportues, nga i cili është marrë arma, sipas deklarimit të pronarit, nuk kishte qenë i ndezur.

“Më 30.10.2026, në SPB Shkup, N.H.I. (74) nga Shkupi ka denoncuar se më 25.10.2026, rreth orës 03:30, në zonën e komunës së Çairit, nga automjeti i tij transportues, i cili sipas denoncimit nuk ishte i kyçur, i është marrë një pistoletë ‘Glock’”, thuhet në njoftimin e MPB-së.

Nga policia bëjnë të ditur se po ndërmerren masa për zbardhjen e plotë të rastit dhe gjetjen e armës së vjedhur.