Qeveria e ardhshme e Holandës nuk do të ketë në gjirin e saj të djathtën ekstreme dhe mund të udhëhiqet nga një kryeministër homoseksual. Në zgjedhjet e fundit humbi terren forca anti-islame “Partia e Lirisë” e drejtuar nga Geert Wilders, ndërsa u rrit mbështetja për partinë e qendrës D66.

Me shumicën e votave të numëruara nga zgjedhjet e së mërkurës, D66 e Rob Jetten dhe PVV e Wilders u barazuan herët të enjten, ku të dyja pritet të marrin 26 vende në dhomën e ulët prej 150 vendesh të parlamentit.

Ky rezultat shënon një rënie të ndjeshme për të djathtën ekstreme, ndërsa D66 trefishoi rezultatin. Zgjedhjet holandeze u panë si një provë nëse e djathta ekstreme mund të zgjerojë shtrirjen apo nëse ka arritur kulmin në këtë pjesë të Europës.

Të gjitha partitë kryesore e kanë përjashtuar qeverisjen me Wilders. Kjo nuk i lë atij një rrugë të qëndrueshme drejt shumicës, ndryshe nga udhëheqësi i ri i D66, Jetten.

“Ne i kemi treguar jo vetëm Holandës, por edhe botës se është e mundur të mposhten lëvizjet populiste dhe të ekstremit të djathtë”, i tha Jetten turmës gjatë festimeve natën e zgjedhjeve.

Për Wilders, rezultati i së mërkurës është shumë më poshtë se 37 vendet që partia anti-emigracion mori në zgjedhjet e mëparshme të vitit 2023.

Por gjithashtu kjo është hera e parë që pati barazim midis dy partive kryesore dhe kjo mund të vonojë dhe ndërlikojë më tej bisedimet për formimin e koalicionit, të cilat zakonisht zgjasin me muaj në Holandë.

Tradicionalisht, partia me më shumë vota ngarkohet së pari nga parlamenti me detyrën për të formuar një qeveri. Meqenëse partitë kryesore kanë përjashtuar një koalicion me Wilders, kjo e vendos Jetten në pozicionin kryesor për të formuar një qeveri dhe për t’u bërë kryeministri më i ri i vendit.

Popullariteti i 38-vjeçarit Rob Jetten u rrit ndjeshëm muajin e kaluar, ndërsa ai bëri fushatë me premtimin për të zgjidhur mungesën e strehimit, për të investuar në arsim dhe për të trajtuar shqetësimet e imigracionit.

Avionët dhe tanket izraelite kanë bombarduar zona në Gazën lindore të enjten, kanë thënë banorët dhe dëshmitarët palestinezë, një ditë pasi Izraeli tha se mbetej i përkushtuar ndaj armëpushimit të mbështetur nga SHBA-ja, pavarësisht nisjes së bombardimeve më vdekjeprurëse në territor.

Dëshmitarët kanë thënë se aeroplanët izraelitë kanë kryer 10 sulme ajrore në zonat në lindje të Khan Younis në Rripin jugor të Gazës, ndërsa tanket kanë bombarduar zonat në lindje të qytetit të Gazës në veri. Nuk u raportuan të lënduar ose të vdekur.

Ushtria izraelite ka thënë se ka kryer sulme “të sakta” kundër “infrastrukturës terroriste që përbënte një kërcënim për trupat” në zonat, të cilat Izraeli ende i pushton.

Sulmet e së enjtes janë prova më e fundit e armëpushimit të brishtë që ka hyrë në fuqi më 10 tetor në konfliktin midis Izraelit dhe Hamasit.

Dëshmitarët në Gaza kanë thënë se nuk kanë parë sulme jashtë zonës që kontrollon Izraeli.

Nga e marta deri të mërkurën, Izraeli është hakmarrë për vdekjen e një ushtari izraelit me bombardime për të cilat autoritetet shëndetësore të Gazës thanë se vranë 104 persona.

Izraeli thotë se ushtari u vra në një sulm nga persona të armatosur në territorin brenda të ashtuquajturës “vijë e verdhë” në të cilën trupat e tij u tërhoqën sipas armëpushimit. Hamasi e ka hedhur poshtë akuzën.