Zohran Mamdani ka fituar garën për kryetar bashkie të qytetit të New Yorkut, teksa demokratët kanë fituar zgjedhjet e para të mëdha gjatë mandatit të dytë të Donald Trumpit.

Mamdani, 34 vjeç, është bërë kryetari i parë mysliman dhe personi më i ri në më shumë se një shekull që drejton qytetin më të madh në SHBA.

“Në këtë moment errësire politike, New Yorku do të jetë drita”, ka thënë Mamdani në një fjalim fitoreje ku përshkruan politikat e tij dhe sfidon presidentin Trump.

Trump ka kërcënuar të shkurtojë fondet federale të New Yorkut nëse Mamdani fitonte ndaj të pavarurit Andrew Cuomo dhe republikanit Curtis Sliwa.

Ndërkohë, demokratët parashikohet të fitojnë garat për guvernator në Virxhinia dhe New Yerseyt.

Kalifornianët votojnë për të rindarë distriktet kongresive të shtetit në favor të Partisë Demokratike përpara zgjedhjeve të vitit të ardhshëm.

Friedrich Merz deklaroi të martën se sirianët nuk kanë më arsye për të kërkuar azil në Gjermani pas përfundimit të luftës civile në vendin e tyre. Ai tha se ata do të inkurajohen të kthehen për të ndihmuar në rindërtimin e Sirisë.

Gjatë 14 viteve të luftës civile, Gjermania ka pranuar më shumë refugjatë sirianë sesa çdo vend tjetër i Bashkimit Evropian. Megjithatë, kancelari dhe anëtarët e kabinetit të tij argumentojnë se situata ka ndryshuar që nga rrëzimi i qeverisë së Bashar al-Asadit 11 muaj më parë.

“Tani nuk ka më arsye për azil në Gjermani, dhe prandaj mund të fillojmë edhe me kthimet”, tha Merz. Ai shtoi se ata që refuzojnë të kthehen mund të përballen me deportim “në të ardhmen e afërt”.

Deklarata e tij duket se bie ndesh me qëndrimin e ministrit të Jashtëm, Johann Wadephul, i cili pas një vizite në Damask javën e kaluar shprehu dyshime se shumë sirianë do të zgjidhnin të ktheheshin për shkak të shkatërrimit dhe pasigurisë që vazhdon të mbizotërojë në vend.

Çështja e kthimit të refugjatëve ka shkaktuar debate brenda Unionit Kristian-Demokrat, me disa politikanë që argumentojnë se kthimi i sirianëve mund të dëmtojë rindërtimin dhe shërbimet në vend.

Një sfidë tjetër për Gjermaninë është integrimi i sirianëve që tashmë jetojnë aty. Shumë prej tyre kanë mësuar gjermanisht, kanë marrë shtetësi ose leje qëndrimi dhe punojnë në sektorë kyç, përfshirë më shumë se 7 mijë mjekë që punojnë sidomos në zonat rurale.

Vetëm rreth 1 mijë sirianë janë kthyer vullnetarisht në vendin e tyre me ndihmën e qeverisë gjermane gjysmën e parë të këtij viti.

Debati ka marrë rëndësi edhe për shkak të zgjedhjeve të shtetit vitin e ardhshëm, ku partia Alternative für Deutschland (AfD) është në konkurrencë të fortë me kristiandemokratët dhe mund të sigurojë poste udhëheqëse në disa shtete.

Rritja e shqetësimeve për sigurinë e Gjermanisë ka nxitur debat pas arrestimit të një siriani 22-vjeçar për planifikim të një sulmi islamik vetëvrasës. AfD-ja e përdori rastin për të kritikuar qëndrimin e Wadephul, duke e quajtur atë “një shuplakë për viktimat e dhunës islamiste”.

Merz gjithashtu njoftoi se ka ftuar presidentin e përkohshëm të Sirisë, Ahmed al-Sharaa, në Gjermani për të diskutuar çështjen e deportimeve të sirianëve me rekorde kriminale, një temë që ka qenë objekt debate për disa kohë.

Autoritetet portugeze kanë arrestuar katër persona pasi ndaluan një nëndetëse në Oqeanin Atlantik, që transportonte më shumë se 1.7 tonë kokainë drejt gadishullit Iberik.

Sipas zyrtarëve, mjeti u lokalizua dhe u sekuestrua gjatë ditëve të fundit, ndërsa pamjet e publikuara tregojnë momentin kur policia dhe marina portugeze e rrethojnë dhe hipin në bord, duke sekuestruar lëndën narkotike të klasës A dhe arrestuar ekuipazhin me katër anëtarë, të gjithë me origjinë nga Amerika e Jugut.

Policia njoftoi se të arrestuarit dy ekuadorianë, një venezuelas dhe një kolumbian, janë lënë në paraburgim pas paraqitjes në gjykatë në ishujt Azore të martën. Shefi i njësisë portugeze kundër trafikut të drogës, Vítor Ananias, deklaroi në një konferencë për shtyp se kombësitë e ndryshme të të dyshuarve tregonin se organizata që qëndron pas tyre nuk vepron vetëm nga një vend i vetëm.

Qendra për Analizë dhe Operacione Detare (MAOC), me seli në Lisbonë, kishte marrë ditët e fundit informacione se një organizatë kriminale po përgatiste nisjen e një nëndetëseje të ngarkuar me kokainë, e destinuar për tregjet evropiane.

Pak ditë më vonë, një anije portugeze arriti të lokalizonte mjetin rreth 1 mijë milje detare (rreth 1.850 kilometra) nga brigjet e Lisbonës, në një operacion të mbështetur nga Agjencia Kombëtare Britanike e Krimeve dhe Administrata Amerikane Kundër Drogës (DEA).

Sipas marinës, pas sekuestrimit, mjeti nuk mund të tërhiqej drejt bregut për shkak të motit të keq dhe strukturës së tij të brishtë, ndaj më vonë u fundos në det të hapur.
“Mes nxehtësisë, avujve të karburantit dhe dallgëve të larta, qëndrimi në bord është jashtëzakonisht i vështirë. Pas 15 apo 20 ditësh, gjithçka që dëshiron është të shpëtosh,” tha Ananias për gazetarët.

Sipas tij, raste të tilla janë bërë të përsëritura vitet e fundit. Në mars të këtij viti, një tjetër mjet i ngjashëm që transportonte 6.5 tonë kokainë u ndalua rreth 1 mijë e 200 milje detare nga Lisbona.

Ngjarja ndodh në një kohë kur administrata amerikane e ish-presidentit Donald Trump ka intensifikuar goditjet ndaj mjeteve që dyshohen se përdoren për trafik droge drejt SHBA-ve.
Vetëm javën e kaluar, tre persona u vranë në një sulm amerikan ndaj një mjeti të dyshuar për trafik droge në Karaibe, bëri të ditur sekretari amerikan i mbrojtjes, Pete Hegseth.

Veprimet e tilla kanë ngjallur debat për ligjshmërinë e tyre sipas së drejtës ndërkombëtare dhe janë kritikuar ashpër nga liderë të Amerikës Latine, qytetarët e të cilëve janë mes viktimave të këtyre operacioneve.