Një infermier paliativ në Gjermani është dënuar me burgim të përjetshëm pasi u shpall fajtor për vrasjen e 10 pacientëve përmes injeksioneve vdekjeprurëse dhe për tentativë vrasjeje të 27 të tjerëve, njoftoi të mërkurën një gjykatë në Aachen.

Sipas prokurorëve, infermieri u kishte dhënë pacientëve – shumica të moshuar – doza të tepërta qetësuesish ose analgjezikësh për të lehtësuar ngarkesën e tij të punës gjatë turneve të natës.
Zëdhënësi i gjykatës tha se krimi u vlerësua si “veçanërisht i rëndë”, gjë që do të thotë se i dënuari ka shumë pak gjasa të lirohet pas 15 vjetësh, që është minimumi ligjor i vuajtjes së një dënimi me burgim të përjetshëm në Gjermani.

Krimet janë kryer midis dhjetorit 2023 dhe majit 2024 në një klinikë pranë qytetit Aachen, në perëndim të Gjermanisë. Vendimi mund të apelohet, ndërsa autoritetet po hetojnë edhe disa incidente të tjera të dyshimta gjatë karrierës së infermierit, raportojnë mediat gjermane.

Rasti ka rikthyer në kujtesë një tjetër ngjarje tronditëse në vitin 2019, kur një ish-infermier u dënua me burgim të përjetshëm për vrasjen e 85 pacientëve  krimi më i rëndë serial në historinë e pasluftës në Gjermani.

Në intervistën e tij të parë që nga zgjedhja si kryebashkiak i New Yorkut, Zohran Mamdani i ka thënë ABC-së se fitorja e tij i jep atij një mandat për të ndjekur një “agjendë ambicioze përballueshmërie”, duke synuar transformimin e “qytetit më të shtrenjtë” në SHBA në “një qytet të përballueshëm”.

I pyetur nëse mund ta bëjë këtë pa rritur taksat, ai ka thënë se do të duhet t’i rrisë ato për “1%  për njujorkezët më të pasur”.

Para zgjedhjeve, presidenti i SHBA-së, Donald Trump kishte kërcënuar të shkurtonte fondet federale për qytetin nëse Mamdani fitonte. 

Mirëpo Mamdani ka thënë se është i përgatitur t’i kundërvihet presidentit nëse ai vendos të dëmtojë qytetin e New Yorkut.

“Kërcënimet e tij janë të pashmangshme”, ka thënë Mamdani.

Mamdani planifikon të prezantojë një taksë të sheshtë prej 2% për njujorkezët që fitojnë më shumë se 1 milion dollarë në vit. Ai gjithashtu planifikon të rrisë normën e taksës së korporatave në New York në 11.5%. Ai thotë se kjo do të mbledhë rreth 9 miliardë dollarë.

I pyetur nëse kjo do t’i largojë krijuesit e vendeve të punës nga qyteti, Mamdani ësht shprehur se punëtorët tashmë po largohen për shkak të kostos së lartë të kujdesit për fëmijët, duke e bërë të vështirë për bizneset të mbajnë talentet.

Presidenti rus Vladimir Putin ka reaguar lidhur me deklaratat e presidentit amerikan Donald Trump për testimet bërthamore, duke thënë se duhet të shihen me shumë seriozitet dhe se nuk duhet të neglizhohen.

Megjithatë, ai ripërsëriti se Rusia nuk ka në plan të tërhiqet nga Traktati për Ndalimin e Testeve Bërthamore dhe paralajmëroi domosdoshmërinë për të reaguar nëse traktati shkelet.

Presidenti rus bëri të qartë se vendi i tij mbetet besnik i traktatit dhe se nuk ka ndërmend të tërhiqet prej tij, shkruajnë mediat ndërkombëtare.

Putin gjithashtu udhëzoi Ministrinë e Jashtme, Ministrinë e Mbrojtjes, agjencitë e inteligjencës dhe shërbimet politike që të fillojnë përgatitjet për testet e armëve bërthamore.

Më herët presidenti amerikan, Trump konfirmoi se vendi i tij do të rifillonte testimet bërthamore, por nuk dha shumë detaje.

“Do ta mësoni shumë shpejt, do të bëjmë disa testime. Vende të tjera po e bëjnë. Nëse po e bëjnë ato, do ta bëjmë edhe ne”, mësohet të ketë thënë Trump në një deklaratë të dhënë më herët për testimet bërthamore.

Organizata Botërore e Shëndetësisë planifikon të dielën të nisë një fushatë të gjerë për vaksinim në Rripin e Gazës.

Rreth 44.000 fëmijë, të cilët nuk mundën të mbuloheshin nga procesi i imunizimit gjatë luftës dyvjeçare të Izraelit kundër organizatës militante palestineze Hamas, do të vaksinohen brenda 10 ditëve kundër, ndër të tjera, fruthit (lisë), shytave, rubeolës dhe poliomelitit (paralizës infantile).

Dozat e ardhshme duhet të administrohen në janar.

Pas shfaqjes së virusit të poliomelitit në Rripin e Gazës, OBSH-ja kreu fushata vaksinimi kundër poliomelitit gjatë armëpushimeve në verën e vitit 2024 dhe shkurt 2025. Edhe pse kishte ekipe mobile vaksinimi, disa fëmijë nuk mund të përfshiheshin.

OBSH-ja vlerëson se 20 për qind e fëmijëve nën pesë vjeç nuk janë vaksinuar kurrë ose janë vaksinuar në mënyrë të pamjaftueshme për shkak të konfliktit.

Njëkohësisht me fushatën e imunizimit, Fondi i OKB-së për Fëmijë, UNICEF, do të vlerësojë kequshqyerjen në mënyrë që të jetë në gjendje t’i ndihmojë të rinjtë sa më shpejt dhe në mënyrë specifike.

Sipas OBSH-së, shkalla e përgjithshme e vaksinimit në Rripin e Gazës para luftës ishte 98 për qind. Tani vlerësohet te është më pak se 70 pëqind.

Drejtori i inteligjencës turke MIT, Ibrahim Kalin në Stamboll u takua me një delegacion nga Byroja për negociata politike e grupit islamist Hamas, njoftoi televizioni shtetëror turk TRT Haber.

Gjatë takimit, delegacioni i Hamasit falënderoi Turqinë për rolin e saj si garantuese e Marrëveshjes së Armëpushimit, për përpjekjet e saj si ndërmjetëse në negociata, si dhe për mbikëqyrjen e këtij procesi nga presidenti turk Rexhep Tajip Erdogan.

Delegacioni edhe njëherë konfirmoi se Hamasi mbetet i përkushtuar ndaj Marrëveshjes së Armëpushimit, pavarësisht shkeljeve të dyshuara nga Izraeli.

Gjatë takimit, pjesëmarrësit diskutuan për hapat e nevojshëm për të çuar përpara procesin e armëpushimit dhe si të kapërcehen problemet ekzistuese. Ata gjithashtu paraqitën vizionet e tyre se si të vazhdohet procesi i zbatimit të fazës tjetër të Planit.

Turqia paraqiti informacione për ndihmën humanitare që ka dërguar dhe përpjekjet e saj për t’i dhënë fund tragjedisë njerëzore në Gazë. U shqyrtuan gjithashtu aktivitetet me organizatat ndërkombëtare për të siguruar qasje në sasi më të mëdha ndihme humanitare, informoi televizioni.