Policia e Parisit thotë se “gjithçka është e qetë” në qytet, ndërsa në kryeqytetin francez kanë nisur demonstratat.

Në një postim në X, prefektura bën të ditur se forcat e saj janë “në terren dhe në ajër, për t’u mundësuar demonstruesve të marshojnë të sigurt nga Porte d’Italie deri në Porte de Vincennes”.

Në Paris është lejuar një protestë, e cila duhet të zhvillohet në mënyrë strikte përgjatë një itinerari të caktuar.

Më herët, efektivët e policisë u kërkuan njerëzve të largohen nga sheshi “Place de la Bastille” dhe të drejtohen për te “Porte d’Italie”, ku fillon marshimi i autorizuar.

Administrata e presidentit amerikan, Donald Trump, ka vendosur të lehtësojë disa nga tarifat prej 50 për qind për mallrat kanadeze. Vendimi vjen vetëm dy javë para zgjedhjeve të mesmandatit në SHBA, në një kohë kur presioni ekonomik dhe ndikimi i tarifave te bizneset mbeten çështje të rëndësishme.

Sipas Shtëpisë së Bardhë, nga 30 tetori do të ulen tarifat për disa produkte, përfshirë fletët e kompensatës, produkte të caktuara të letrës, makineri dhe pajisje frigoriferike. Në të njëjtën kohë, për disa mallra të tjera, si qilimat dhe kategori të caktuara mbetjesh, do të vendosen tarifa të reja.

Vendimi vjen pas kërkesave të senatorëve republikanë për të zbutur ndikimin e masave tregtare te bizneset dhe ekonomia amerikane.

Senatorja republikane Susan Collins deklaroi se kishte kërkuar vazhdimisht nga administrata Trump lehtësimin e tarifave. Ajo tha se përjashtimet e reja do të ndihmojnë sektorin bujqësor në shtetin e Meinit, veçanërisht prodhuesit e boronicave, patateve, mollëve dhe algave të detit.

SHBA vendosi tarifa prej 50 për qind për mallra kanadeze me vlerë rreth 20 miliardë dollarë, pasi negociatat tregtare mes dy vendeve dështuan në gusht. Kanadaja iu përgjigj me masa kundër SHBA-së, duke argumentuar se ato janë të nevojshme për mbrojtjen e punëtorëve të saj.

Kryeministri kanadez, Mark Carney, ka kërkuar një marrëveshje të re tregtare që do të ishte e dobishme për të dyja vendet. Ai deklaroi se Kanadaja është e gatshme të presë edhe disa muaj, nëse nuk arrihet një marrëveshje që mbron interesat e saj.

“Ne mund ta nënshkruanim marrëveshjen që këtë pasdite, nëse SHBA-ja do të ishte gati”, deklaroi Carney të premten, sipas transmetuesit kanadez CBC.

Nga ana tjetër, Trump ka deklaruar se Kanadaja po punon intensivisht për të arritur një marrëveshje tregtare me SHBA-në. Shtëpia e Bardhë e ka paraqitur lehtësimin e disa tarifave si pjesë të përpjekjeve për të mbrojtur punëtorët amerikanë dhe për të siguruar kushte të drejta tregtare.

Çështja e tarifave ka marrë rëndësi të veçantë edhe në prag të zgjedhjeve të mesmandatit, të cilat do të përcaktojnë nëse republikanët apo demokratët do të kontrollojnë Kongresin amerikan. Ekonomitë e disa shteteve amerikane kufitare me Kanadanë janë të lidhura ngushtë me tregtinë mes dy vendeve.

Kandidati demokrat për Senatin në Mein, Troy Jackson, kritikoi senatorën Collins, duke e akuzuar se kishte mbështetur politikat tregtare të Trumpit dhe se tani po përpiqej të përfitonte politikisht nga lehtësimi i tarifave.

Pavarësisht këtij vendimi, mosmarrëveshjet tregtare mes SHBA-së dhe Kanadasë mbeten të pazgjidhura, ndërsa të dyja palët vazhdojnë përpjekjet për një marrëveshje të re.

Franca ka shtuar masat e sigurisë në prag të protestave të paralajmëruara për këtë të shtunë. Rreth 70 mijë policë dhe xhandarë janë angazhuar në të gjithë vendin, ndërsa autoritetet druhen nga përsëritja e skenave të dhunës, plaçkitjeve dhe sulmeve ndaj institucioneve publike.

Forcat e sigurisë janë shtuar me rreth 10 mijë efektivë më shumë krahasuar me protestat e 17 tetorit. Plani përfshin edhe automjete të blinduara, helikopterë, topa uji dhe njësi speciale, me qëllim parandalimin e përplasjeve të reja.

Ministri i Brendshëm francez, Laurent Nuñez, ka paralajmëruar se autoritetet nuk do të tolerojnë akte dhune dhe shkatërrimi. Ndërkohë, në më shumë se 100 qytete janë vendosur kufizime, përfshirë ndalimin e protestave në zona të caktuara dhe kufizimin e lëvizjes gjatë natës.

Masat e sigurisë kanë prekur edhe jetën kulturore dhe sportive. Në Paris, të shtunën do të jenë të mbyllura disa institucione të rëndësishme, përfshirë Muzeun e Luvrit, Musée d’Orsay dhe Operën e Parisit.

Edhe panairi ndërkombëtar i artit Art Basel Paris ka anuluar programin e fundjavës, ndërsa ndeshja mes Paris Saint-Germain dhe Lyon është shtyrë për të hënën për arsye sigurie.

Në përpjekje për të ulur tensionet, presidenti Emmanuel Macron është takuar me përfaqësues të organizatave të nxënësve. Megjithatë, këta të fundit kanë paralajmëruar se protestat do të vazhdojnë nëse nuk plotësohen kërkesat për përmirësimin e infrastrukturës shkollore dhe reformimin e sistemit të pranimit në universitete.

Protestat, që vijojnë prej disa javësh, lidhen me pakënaqësitë për rritjen e kostos së jetesës, presionin mbi të ardhurat dhe problemet në shërbimet publike.

Qeveria franceze tashmë përballet me një sfidë të dyfishtë: të parandalojë përshkallëzimin e dhunës dhe të gjejë zgjidhje për pakënaqësitë sociale që kanë nxitur mobilizimin e qytetarëve.