Qeveria e Italisë do të dërgojë 500 trupa për të “mbrojtur Milanon”, pas dy ditësh trazirash gjatë të cilave demonstruesit u përleshën me policinë, plaçkitën dyqane dhe dëmtuan prona, ka deklaruar të hënën mbrëma zëvendëskryeministri, Matteo Salvini.
Vendosja e trupave pritet të përfshihet në një paketë masash sigurie, që do të miratohet në një mbledhje të qeverisë të parashikuar për të martën. Ky vendim vjen në një kohë kur dyqanet në qendër të Milanos mbyllën dyert më herët dhe mbuluan vitrinat me dërrasa, nga frika e shpërthimit të një vale të re dhune në kryeqendrën financiare të Italisë.
“Fjalët po kthehen në veprime: edhe 500 ushtarë për të mbrojtur Milanon”, ka shkruar në rrjetet sociale Salvini, kreu i partisë së djathtë Lidhja, e cila është pjesë e koalicionit qeverisës.
Shumica e dyqaneve në Via Montenapoleone, zonën luksoze të blerjeve në Milano ku ndodhen marka si Chanel, Tiffany dhe Dior, kishin hequr produktet nga vitrinat si masë paraprake.
Qindra protestues me kapuçë, shumë prej të cilëve besohet se ishin të mitur, u kanë vënë flakën koshave të mbeturinave dhe kanë plaçkitur dyqane në qendër të qytetit gjatë fundjavës, pas një proteste që fillimisht ishte paqësore, të shtunën, kundër shërbimeve të dobëta publike dhe rritjes së kostos së jetesës.
Në galerinë Vittorio Emanuele, disa dyqane janë mbyllur dhe janë zbrazur nga mallrat, ndërsa të tjera kanë mbuluar vitrinat dhe kanë shtuar masat e sigurisë.
Kryeministrja italiane Giorgia Meloni, e cila përballet me zgjedhjet kombëtare vitin e ardhshëm, ka dënuar dhunën teksa të hënën ka drejtuar një takim me ministrat dhe drejtuesit e strukturave të sigurisë për të diskutuar situatën.
“Qeveria do t’u përgjigjet me vendosmëri këtyre sulmeve ndaj shtetit, përfshirë përmes masave që synojnë frenimin e dhunës nga të miturit”, ka shkruar në rrjetin social X ministri i Jashtëm, Antonio Tajani, i cili, ashtu si Salvini, mban edhe postin e zëvendëskryeministrit.
Gazeta “Corriere della Sera” ka raportuar se, si pjesë e masave të planifikuara, Meloni po shqyrton mundësinë e zgjatjes së paraburgimit parandalues për të miturit dhe ndërmarrjen e masave kundër bandave të të rinjve. Ajo po shqyrton gjithashtu përshpejtimin e zbatimit të disa dispozitave të një projektligji ekzistues për sigurinë, i cili po shqyrtohet aktualisht nga parlamenti.
Policia italiane ka njoftuar se gjatë trazirave të së dielës në Milano kishte shoqëruar në komisariate 271 të rinj. Nga personat e shoqëruar, 32 janë arrestuar, përfshirë 23 të mitur dhe 13 shtetas të huaj, ka bërë të ditur policia të hënën.
Trazirat pasuan përleshjet e së shtunës në qytete të tjera të Italisë veriore, përfshirë Bolonjën, Breshian, Bergamon dhe Torinon, ku, sipas një raporti të policisë të publikuar të dielën, janë arrestuar 28 protestues.
Ngjarjet u zhvilluan njëkohësisht me trazirat në Francën fqinje, ku qindra mijëra njerëz, të zemëruar nga rritja e kostos së jetesës dhe përkeqësimi i shërbimeve publike, dolën në rrugë të shtunën, në disa prej protestave më të dhunshme që vendi ka përjetuar prej vitesh.
