Osmani do të marrë pjesë në takimin ministror të Këshillit Veriatlantik të NATO-s

Ministri i Punëve të Jashtme, Bujar Osmani nesër dhe pasnesër do të marrë pjesë në takimin e Këshillit Veriatlantik të NATO-s në nivel të Ministrave për Punë të Jashtme e cila për shkak të restrikcioneve të imponuara nga pandemia do të mbahet përmes video lidhjes.

Sipas rendit të ditës, siç njofton ministria përkatëse, është paraparë që takimi i ministrave të Jashtëm të vendeve anëtare të diskutojnë për çështje me prioritet për NATO-n, si dhe sfidat aktuale me të cilat ballafaqohet: situatat me Afganistanin, ndikimi i raporteve gjeostrategjike globale mbi sigurinë e fushës euroatlantike, si dhe stabiliteti më i gjerë rajonal.

Ministrat do të shqyrtojnë edhe raportin e titulluar “NATO 2030”, që reflekton nevojat strategjike dhe sfidat për Aleancën në dekadën e radhës, ndërkaq është paraparë që të aprovohen edhe disa vendime në lidhje me temat që janë temë e diskutimit në kuadër të NATO-s.

Në kuadër të takimit, ministri Osmani do të ketë paraqitje në sesionin e parë punues të takimit, që do të jetë paraqitja e tij e parë në Këshillin Veriatlantik që nga marrja e funksionit ministër i Punëve të Jashtme.