Nëntë kompani në garë për kryerës të punimeve, ofertat për segmentin Bukojçan – Kërçovë deri më 30 shtator

Nëntë kompani janë përfshirë në procesin e përzgjedhjes së kontraktorit për ndërtimin e autostradës Bukojçan-Kërçovë, pjesë e Korridorit 8, me një gjatësi prej 11.5 kilometrash, pasi ka përfunduar faza e parakualifikimit sipas tenderit të Ndërmarrjes Publike për Rrugët Shtetërore.

Kompanitë e parakualifikuara sot kanë marrë ftesë për të dorëzuar ofertat financiare deri më 30 shtator. Ndërmarrja për Rrugët Shtetërore njofton se me mjete të siguruara përmes një huaje nga Banka Evropiane për Rindërtim dhe Zhvillim, së shpejti do të nisë ndërtimi i segmentit të autostradës nga Bukojçani deri në Kërçovë. Sipas ndërmarrjes, ndërtimi i segmentit autostradal Bukojçan-Kërçovë, si pjesë e Korridorit evropian 8 në nivel autostrade, do të përmirësojë ndjeshëm lëvizshmërinë dhe shkëmbimin tregtar, sigurinë në rrugë, do të shkurtojë kohën e udhëtimit dhe do të rrisë mundësitë për zhvillim ekonomik./TV21