Mijallkov i qetë në seancën për “Titanik 2”/ Bubevski pret vendim të shpejtë të gjykatave

TË FUNDIT

Pas bujës së madhe që u bë javën e kaluar me mungesën e Sasho Mijallkovit në seancën gjyqësore për “Titanik 2”, burgu i Strugës sot e solli atë në Gjykatën Penale në Shkup.
Mijallkov me avokatët e tij nuk u përfshinë aspak në seancë, e kjo me siguri për shkak të mundësisë që vepra e ish-drejtorit të DSK të vjetërsohet.
Prokurori i lëndës Gavril Bubevski, pret që të ketë vendim të shpejtë para se të vjetërsohet vepra.

”Gjykata siç po e shihni po mundohet që kjo të përfundojë sa më shpejt të jetë e mundur. Unë shpresoj se edhe Apeli do të marrë vendim në afatin e paraparë deri në momentin kur ka vjetërsim absolut mbi këtë lëndë. Pra edhe Themelorja edhe Apeli”- deklaroi Gavrill Bubevski, Prokuror.
Për të akuzuarit e tjerë lënda “Titanik 2” mbetet për procedim e sipër sepse afatet për vjetërsim janë më të mëdha sqaroi Bubevski. E për këtë arsye ndryshe nga Mijallkov, kreu i PDSH-së Menduh Thaçi dhe Bedredin Ibraimi në seancën për dëgjimin e dëshmitarëve vazhdimisht parashtronin pyetje për ish-pjesëtarët e KSHZ-së.
Prokurori Bubevski i cili ishte pjesë e ish- Prokurorisë Speciale tha se ndjehet i zhgënjyer që për shumë lëndë të PSP-së nuk pat epilog.
“Ndjenja është e njëjte sikur e të gjithë qytetarëve në vend. Pra thjeshtë drejtësia që duhej ta mundësonte Prokuroria Speciale është e qartë se nuk u arrit, të paktën nga pikëpamja e disa lëndëve të cilat ende nuk kanë përfundimin e tyre. Megjithatë ne jemi një palë në procedurë, edhe pala mbrojtëse, pra të akuzuarit bashkë me avokatët janë palë tjetër në lëndë dhe në fund është gjykata ajo që gjykon në lëndë”- pohoi Gavrill Bubevski, Prokuror.
Sipas Bubevskit, sistemi me gjykatësit porotë është vjetërsuar, nuk është funksional dhe është problemi më i madh se përse deri tash nuk kemi drejtësi më të shpejtë. Sipas tij kjo gjë duhet të rregullohet në Kodin e ri për procedurë penale dhe gjykatësit porot të mos kenë ndikim të tillë.
Sipas aktakuzës, Sasho Mijallkov përmes Menduh Thaçit kishte urdhëruar bashkë-partiakun e tij nga KShZ-ja, Bedredin Ibraimi për anulimin e votimit të rregullt në një vendvotim në Strumnicë, në favor të kandidatit të VMRO DPMNE-së.

error: Content is protected !!