Ligji për pagesë të rrogave për tetor, nëntor dhe dhjetor është duke u vonuar. Afatet po ngushtohen, kurse pjesa më e madhe e barrës për aplikim dhe përgatitje të dokumentacionit të nevojshëm, do të bjerë mbi kontabilistët. Kërkesa për të marrë ndihme financiare do të mund të paraqitet më së voni deri më 7 nëntor, kurse do të duhet të dorëzohen edhe llogaritjet për të ardhurat e realizuara dhe të sigurohen të gjitha dokumentet e nevojshme. Nga Oda e Kontabilistëve reagojnë se për shkak të afateve të shkurtra, disa ndërmarrje nuk do të mund të aplikojnë për të marrë ndihmë nga shteti. Arsyeja për këtë, siç thonë, është koordinimi i dobët mes institucioneve shtetërore, respektivisht mes Ministrisë së Financave dhe Drejtorisë së të Ardhurave Publike. Kontabilistët apelojnë që të definohen qartë kushtet për marrje të ndihmës financiare.
“Duhet qartë të definohet nëse me këtë mbështetje të paraparë mund të paguhet bruto apo neto paga ose varet nga kompania që aplikon”, tha Aleksandra Andreeva nga Oda e Kontabilistëve.
Në kushte normale llogaritjet për pagesën e pagave fillojnë nga data 25, që të mund në kohë të paguhen kontributet deri më datën 15 të muajit të ardhshëm.
“Për shembull sot jemi 27 tetor, ndërsa ligji për mbështetje financiare për pagesën e pagave për tetorin, nëntorin dhe dhjetorin ende nuk është sjellë. Disa ndërmarrje për shkak të afateve të shkurtra mund të vijnë në situatë që të mos arrijnë të aplikojnë dhe të mbesin pa ndihmën e nevojshme”, deklaroi Aleksandra Andreeva.
Ligje të sjella në kohën e duhur dhe bashkëpunim më i mirë mes institucioneve ka rëndësi të madhe në funksionimin e ekonomisë, tha Andreeva. Kolegu i saj thirri për zvogëlim të procedurave burokratike.
“Ky vit nuk është si të tjerët, edhe ne jemi njerëz, nuk jemi të bërë nga guri. Me të vërtetë nuk është solidare nga ne të kërkohet bartja e gjithë ngarkesës”, theksoi Bllagoja Grozdanov nga Oda e Kontabilistëve..
Grozdanov tha se shpreson se institucionet do të vazhdojnë afatet për parashtrimin e raportit që bie në barrën e tyre. Sipas tij, shteti e ka patjetër t’i dëgjojë vërejtjet e sektorit privat për shkak se vetëm në atë mënyrë në të ardhmen mund të ketë zgjidhje funksionale.