Kryeministri i Italisë, Xhuzepe Konte sot i porositi italianët se do të mund t’i kalojnë pushimet vjetore në plazhe dhe destinacione turistike në vend, e cila gradualisht filloi t’i heqë kufizimet e vendosura në luftën kundër epidemisë me koronavirusin e ri.
“Verën nuk do ta kalojmë në ballkone, duke i lënë bukuritë e Italisë në karantinë. Do të mund të shkojmë në plazhe, male dhe qytetet tona të bukura”, theksoi Konte për edicionin javor të Korriere dela Sera.
Ai shtoi se do të ishte mirë nëse italianët e kalojnë pushimin në Itali, edhe pse këto pushime do të jenë më ndryshe pasi njerëzit do të duhet t’i ndjekin rekomandimet dhe masat e shtabit shëndetësor dhe të jenë të kujdesshëm, transmeton Hina.
Konte nuk tha nëse italianëve do t’u lejohet të udhëtojnë jashtë vendit.
Sipas masave restriktive aktuale, italianëve nuk u lejohet të udhëtojnë nga njëra krahinë në tjetër pa arsye valide. Konte tha se akoma nuk është e ditur nëse ky kufizim do të hiqet pasi varet nga rrjedha e epidemisë./MIA