Komuna e Çairit shënoi 7 Marsin – Ditën e Mësuesit/ Ganiu: Arsimi është vlera e vërtetë dhe unike e një kombi

Veteran të arsimit, mësues e arsimtarë aktual të komunës së Çairit, të gjithë bashkë i kishte mbledhur Komuna e Çairit për të shënuar 7 Marsin, Ditën e mësuesit.

Arsimtari Qemaledin Emini për më shumë se 40 vite ka ushtruar profesionin e arsimtarit. Në fillim ka punuar në fshatin Straçincë, pastaj në Haraçinë, Studeniçan dhe në fund në Çair, kurse tani është në prag të pensionimit. Gjatë kësaj periudhë thotë se qëllimi i vetëm i tij ka qenë arsimimi dhe edukimi i gjeneratave të reja.

“Prej vitit 1980, bile edhe më shumë po 40 vite i kam rrumbullaksuar. Çdo herë kemi qenë krenar sepse jemi munduar në formën tonë aq sa kemi mundur kemi punuar me zell, me përkushtim dhe me gjithë të mirat. Ka pasur raste të ndryshme kur kemi punuar fshatrave, në qytete, mirëpo në përgjithësi jemi munduar mjaftë”- thotë Qemaledin Emini, arsimtar.

Ndërkaq mësuesja Snezhana Minova tashmë është pensionuar. Thotë se ndjehet krenare me gjeneratat që ka edukuar.

“Ata të cilët më njohin në rrugë, unë disa nuk i njoh sepse janë rritur. Ky është një nder i madh për mua sepse disa janë bërë mjek, pra të gjithë janë të aftë për punë dhe për jetë”- thotë Snezhana Minova, mësuese.

Kryetari i komunës së Çairit, Visar Ganiu, mësimdhënësve të dalluar dhe veteranëve të arsimit u ndau mirënjohje dhe dhurata.

“S’ka mëdyshje se arsimi është vlera e vërtetë dhe unike e një kombi. Është fryma, ekzistenca dhe shtylla kryesore e tij. Peshën e kësaj vlerë nuk mund ta barazojmë me asgjë tjetër me të çmueshme se arsimi”- deklaroi Visar Ganiu, Kryetar i Çairit.

Komuna e Çairit shpalli qytetar nderi afaristin Selman Imerin për kontributin e tij në arsim në komunën e Çairit. Dita e mësuesit- 7 marsi është një festë e cila i kushtohet personelit edukues të shkollave dhe universiteteve. Kjo datë ka zanafillën e hershme që të kujton themelet e para të shkollës shqipe, në fakt ka filluar të kujtohet që nga viti 1960-të, kur shteti shqiptar vendosi që kjo ditë të jetë festë në shenjë përkujtimi të themelimit të të parës mësonjëtore shqipe të Korçës, e cila u themelua më 7 mars 1887.