Gurorja në Straçincë/ Banorët nuk e duan, Ministria thotë se ka leje

Kjo është rruga që të çon në kodrën mbi fshatin Straçincë, kur parashihet të hapet një gurore.

Me ndihmën e banorëve, përmes rrugës që e ka hapur investitori, TV21 arriti deri në vendin, ku sipas banorëve janë hapur gropat për vendosjen e shpërthyesve që do të hapen gropat për nxjerrjen e lëndës së parë, por ata nuk pajtohen me këtë.

“I bie d.m.th. afër fshatit.
Afër afër, 200 metra…

“Kjo pjesa përpjetë ka qef ai të vijë të punojë guroren.”

Druajnë se me shpërthimet që do të bëhen, do tu prishet qetësia dhe do tu dëmtohen shtëpitë.

“Kur ta minojnë këtu, kur të vendoset eksplozivi, atje mund të rrokullehen dhe gjysmën e katundit ta marrin nëpër këmbë.”

Për këtë kanë firmosur edhe peticion, sepse madje mund të dëmtojnë edhe kafshët e egra.

“Katërqind e njëzetë janë. Shoqata e gjuetarëve, edhe ata janë kundër sepse e shpërngulin krejt egërsinë, lepurin, falëzën, risin… “

Për të dëgjuar banorët por edhe investitorin që e ka koncesionin për guroren, dje në Straçincë erdhën përfaqësues të Ministrisë së Mjedisit, por debati publik ishte i pamundur të mbahej për shkak të kundërshtimeve të banorëve. Ndonëse debati dështoi, Besa Tateshi nga ministria e mjedisit thotë se ende janë të hapur për bashkëpunim me qytetarët, edhe pse siç shton, debati nuk është diçka e domosdoshme me ligj. Sipas saj, nëse do ishte rrezikuar jeta e banorë ministria nuk do të nënshkruan leje.

“Rreziqet që identifikohen, automatikisht duhet të jepet masa me të cilën ai rrezik, impakt mbi mjedisin, zvogëlohet në minimum. Siç është e njohur me të gjitha guroret, problemi kyç me punën e guroreve është pluhuri, gjenerimi i pluhurit gjatë bluarjes apo rrëmimit të gurit, ligji parasheh masa, një sërë masash si ai pluhur ose koncentrimi i pluhurit të bie deri në atë nivel sa që nuk do të paraqesë rrezik për banorët.
-Mirëpo banorët ankohen se nëse punohet aty mund të plasariten edhe shtëpitë e tyre.
Unë përsëri them që qëllimi Im ishte t’i dëgjojnë nga vetë investitori, cilat janë masat që ai duheshte, që e ka për obligim, e ka për detyrë t’i ndërmarrë që qytetarët mos të ndjejnë probleme të tilla.”- deklaroi Besa Tateshi nga Ministria e Mjedisit.

TV21 pyeti edhe në Ministrinë e Ekonomisë për koncesionin e dhënë për guroren. Nga atje na thanë se me vendim të Qeverisë koncesioni është dhënë në vitin 2015, ndërsa në 2017-tën leje për eksploatim.

“Ministria e Ekonomisë duke pasur parasysh kërkesën e Bashkësisë Lokale Straçincë prej 2013-tës, ka kërkuar nga Inspektorati për Inspektimin Teknik, si organ kompetent, për të përcaktuar nëse janë plotësuar disa nga kushtet ligjore për anulimin e kontratës koncesionare dhe pritet një përgjigje prej tyre. Gjithashtu me shkresën më datë 23.11.2023, Ministria e Ekonomisë ia ka përcjellë shkresën në fjalë Inspektoratit të Inspektimit Teknik së bashku me kërkesën e Bashkësisë Lokale Straçincë në Inspektoratin Shtetëror të Mjedisit, nga e cila ende pritet përgjigje.”- thanë nga Ministria e Ekonomisë.

Nga Ministria e Ekonomisë shtojnë se koncesioni mund të anulohet vetëm në rast se përmbushet kushtet e parapara me ligj për ta bërë një gjë të tillë, sepse kur është dhënë, janë respektuar procedurat ligjore.