Filmi “Shelgu” i regjisorit Millço Mançevski do të jetë kandidat i Republikës së Maqedonisë së Veriut për “Oskar” për film më të mirë internacional i metrazhit të gjatë për vitin 2021, njoftoi Shoqata e Punonjësve të Filmit të Maqedonisë (SHPFM).
Vendimin e mori Komisioni për Përzgjedhje të Kandidatit nga Maqedonia e Veriut për çmimin “Oskar” pranë SHPFM, në përbërje të: Igor ivanov – regjisor dhe kryetar i Komisionit, Dejan Liliç – aktor, Tamara Kotevska – regjisore, Samir Luma – kinematograf, Martin Ivanov – montazher, Ivan Gjorshev – mjeshtër i ndriçimit dhe Sanja Arsovska – aktore.
Në konkurrencë për kandidaturë ishin edhe filmat: “Efekti i lumturisë” në regji të Borjan Zafirovskit, “I zhdukuri” i Arben Thaçit, “Qejfi” i Bllazhe Dulev dhe “Nezo” në regji të Merita Çoçolit.
SHPFM njoftoi se kandidatura për filmin “Shelgu” si përfaqësues i yni në garën për çmimin më të njohur të filmit është pranuar dhe aprovuar nga Akademia Amerikane për Fotografi Lëvizëse, Art dhe Shkencë.
Për shkak të pandemisë Kovid-19, ceremonia e 93-të për ndarjen e çmimeve “Oskar” do të mbahet më vonë se zakonisht, gjegjësisht më 25 prill të vitit 2021 (e diel) në Los Anxhelos.