Dokumenti kontrovers i Vrapçishtit! BDI akuzon kryetarin për spiunazh, Shabani thotë se është fals

Për disa ditë në media qarkullon një dokument i shkruar, në të cilin qëndron emri i kryetarit të Komunës së Vrapçishtit, Isen Shabani. Në këtë dokument i cili është  dërguar deri te organet e rendit, qëndron se disa banorë të fshatit Dobridoll do të organizojnë protestë si dhe se një grup qytetarësh kanë ndërtuar një shqiponjë të madhe.

Për këtë kanë reaguar nga BDI. Deputeti Berat Ajdari fajëson kryetarin e Komunës së Vrapçishtit për spiunazh të bashkëqytetarëve të tij.

“Ky akt i Isen Shabanit tregon fytyrën e vërtetë të tij dhe bashkëpartiakëve të tij. Tregon patriotizmin e tyre të rrejshëm që mundohen ta shesin tek qytetarët shqiptarë. Kur një kryetar komune spiunon ata që i kanë dhënë besimin për të drejtuar komunën imagjinon çfarë mund të bëjnë të njëjtit të jenë në pushtet”, deklaroi Berat Ajdari, deputet I BDI-së.

Nga Aleanca për Shqiptarët nuk deshën të komentojnë akuzat e tilla.

“Ne nuk merremi me të pavërteta dhe besoj se adresa për këtë pyetje është kryetari i Komunës së Vrapçishtit dhe besoj se do të merrni përgjigje nga ai”, pohoi Elmi Aziri, deputet i ASH-së.

Ndërsa nëpërmjet rrjetit social Facebook, reagoi vetë Isen Shabani, kryetari i Vrapçishtit.

“Me bindje të plotë MOHOJ kategorikisht vërtetësinë e atij “dokumenti” që klane të caktuara nga pushteti i turpshëm i BDI-së e shpërndanë në rrjetet sociale. Ajo letër e shpërndarë është FALSE dhe shpërndarësi i saj do të përgjigjet penalisht. Shpifjet e tilla nuk ua mbulojnë turpin që e keni bërë dhe po e bëni vazhdimisht ndaj kombit dhe qytetarëve të këtij vendi”, shkruan Isen Shabani, kryetar i Komunës së Vrapçishtit.

Sipas Shabanit letra e tillë e është e falsifikuar dhe për këtë do të kërkoj përgjegjësi penale nga personi që e ka shpërndarë