Përroi në fshatin Shipkovicë vazhdon të ngelet një rrezik për këtë fshat, sidomos për ata banorë që u kalon rreth shtëpive të tyre. Ish-koordinatori i vërshimeve të vitit 2015 thotë se që nga ajo kohë ky përrua nuk është pastruar, ndërsa digat që u premtuan në atë kohë dhe nga shumë institucione më pas kanë ngelur vetëm një premtim edhe sot e kësaj dite.
“Për momentin nuk është marrë asnjë iniciativë për rregullimin e kësaj, ka pasur disa tentativa, ka pasur disa premtime dhe këtu ka nevojë për diga dhe parashihen katër apo pesë diga për të parandaluar ndonjë vërshim të ardhshëm që mos dhashtë Zoti të vijë se mund të na shkaktojë dëme edhe më të mëdha por deri më tani nuk kemi asgjë konkrete”, tha Dashmir Sadiku – ish-koordinator për vërshimet e vitit 2015.
Për banorët që kalojnë në pjesën ku kanë ndodhur vërshimet, rruga që kalojnë është një tmerr i përditshëm, ata duhet të kalojnë disa herë në ditë për të dalë në pjesën qendrore të fshatit.
“Unë jam banor i fshatit dhe banor i kësaj pjesë ku kanë ndodhur vërshimet në 2015 dhe ne përballemi çdo ditë me këtë rrugë që mund të shihni edhe ju, dhe ne kemi probleme të përditshme dhe unë duhet tre a katër herë të kaloj në këtë rrugë me baltë dhe me rreziqe që mund të ndodhë edhe të rrëshqasë i gjithi dhe le të dihen nevojat e një familjari sepse pjesën më të madhe të shërbimeve e kemi me fshatin”, tha një banor i Shipkovicës.
Por ministri i Ekologjisë Naser Nuredini thotë se për Pollogun ka një projekt të madh ndërsa digat në Shipkovicë do të duhet të fillojnë të ndërtohen në fillim të vitit 2021.
Naser Nuredini: “Kemi një projekt me UNDP- në një projekt të madh për gjithë Pollogun tash dokumentacioni është në përfundim dhe shpresojmë me Shipkovicën të fillojmë sa më shpejt pasi e kemi prioritet në zonën e Pollogut”
Kur pritet të fillojnë punët?
Naser Nuredini: “Besojmë se në fillim të vitit të ardhshëm nëse na lejon koha do fillohet ai shtrat”.
Por banorët e Shipkovicës edhe pas pesë viteve ndjehen të rrezikuar
Rrënojat që po shihini prapa meje janë si pasojë e vërshimeve të vitit 2015 që nga ajo kohë e deri më tani askush nuk e ka marrë mundin që t’i pastrojë të njëjtat.
Vërshimet e vitit 2015 në Tetovë u morën jetën 6 personave nga të cilët dy ishin fëmijë, ndërsa ndërtimi i digave mbrojtëse deri më tani janë premtuar nga kryetarja e Komunës së Tetovës, ish-zv kryeministri Sadulla Duraku dhe nga çdo ministër dhe zv/ministër shqiptar që ka qenë në Ministrinë e Ekologjisë.