Britanisë i kërcënohet kriza më e rëndë në disa shekujt e kaluar

Britania e Madhe me shumë gjasa do të goditet nga kriza më e rëndë ekonomike në disa shekuj, pasi aktiviteti ekonomik pothuajse ka vdekur si rezultat i pandemisë së koronavirusit. Këtë e paralajmëroi sot njëri nga strategët e Bankës së Anglisë.

Jan Vlieg, anëtar i komitetit të normave të interesit të Bankës, paralajmëroi se “bazuar në treguesit e hershëm dhe përvojën e vendeve të tjera të goditura nga kriza pandemike deri më tani, ne duket se po përballemi me një rënie ekonomike që është më e shpejtë dhe më e thellë se gjithçka që kemi parë në shekullin e kaluar, ndërsa mbase edhe më shumë shekuj mbrapa”.

“Pandemia dhe masat e izolimit kanë shkaktuar tronditje dramatike në kanalin e furnizimit, sepse njerëzit nuk janë duke punuar, por edhe në kanalin e kërkesës, sepse karantina i ka prishur modelet e zakonshme të konsumit”, tha Vlieg. Ai shtoi se indeksi PMI tregon, për shembull, se sektori i shërbimeve financiare po përballet shumë më mirë me krizën sesa industria prodhuese ose tekstile.

Ministria e Financave dhe Ekonomisë tha se qeveria do të duhej të huazojë 180 miliardë paund (223 miliardë dollarë) gjatë tre muajve të ardhshëm për të paguar për masat e pashembullta që ka ndërmarrë për ta parandaluar kolapsin e ekonomisë./MIA