Bllokimi që Bullgaria po i bën nisjes së negociatave të Maqedonisë së Veriut me BE-në, drejtpërdrejt po prek edhe Shqipërinë, për shkak se dy vendet janë në të njëjtën pako eurointegruese. Po kryetarja e Komisionit për Politikë të Jashtme të Kuvendit të Shqipërisë, Mimi Kodheli, thotë se për Shqipërinë është më e rëndësishme është që në dyert e BE të hyjnë bashkërisht me Maqedoninë e Veriut, se sa vetëm.
“Besoj në të kundërtën dhe do të vazhdoj të jem e këtij opinion, kështu që sigurisht që ne vijmë nga dy backgrounde të ndryshme reformash, historike, politike po të doni, por që finalizojnë, që ceken dhe puqen në një pikë që është ajo e hapjes së negociatave si dy vende fqinjë brenda Ballkanit perëndimorë. Për ne të qenit bashkë është shumë më rëndësishme se sa të ecurit vetëm”, deklaroi Kodheli.
Kodheli, po ashtu tha se Maqedonia e Veriut nuk e penalizon Shqipërinë për fillim të negociatave me BE-në. Këto fjalë i tha pas takimit që pati me homologun e saj në Maqedoni, Antonio Milloshoskin, i cili thotë se BE nuk ka dëshirë të mjaftueshme që Maqedonia e Veriut të hyjë në BE, përndryshe këtë do ta kishte bërë me kohë.
“Unë mendoj se përderisa BE do të ishte e angazhuar fuqimisht që Maqedonia të fillojë bisedimet, do të kishin mundur ta menaxhojnë këtë edhe me Bullgarinë fqinje. Por është e qartë se nuk ekziston dëshirë e mjaftueshme vetë në BE dhe e qartë është se nuk ekziston besueshmëri e mjaftueshme tek Maqedonia që dikush të investojë një kapital të tillë”, tha Milloshoski.
Maqedonia dhe Shqipëria kanë vite që presin para dyerve të Bashkimit Evropian. Maqedonia është vend kandidat që nga viti 2005, ndërsa Shqipëria që në 2014-tën. Që të dyja dritë jeshile për nisje të bisedimeve morën në mars 2020.