Avokatit i Popullit pranon ankesa të shumta! Qytetarët ankohen nga Fondi Pensional

Qytetarët kur nuk arrijnë të kryejnë punë në institucionet e vendit, ia mësynë zyrës së Avokatit të Popullit.

Në Kërçovë në zyrën e avokatit të popullit i cili mbulon disa komuna, ankesa më të shumta ka ndaj fondit pensional, procedurave juridike të MPB, punësimet në administratë etj. Ylber Rufati, përfaqësues i Avokatit të Popullit në Kërçovë tha se qytetarët ankohen ndaj institucioneve të cilët i vonojnë procedurat e tyre.

“Më tepër ankohen ndaj procedurave nga Fondi pensional, ndaj procedurave juridike të MPB, gjykatave si dhe ndaj punësimeve të ndryshme të cilët edhe pse kanë marr vendime, institucionet e ndryshme nuk i kanë thirrur ata sipas vendimit të marrë” tha për TV21 Avokati i Popullit në Kërçovë.

Problem më të theksuar ka komuniteti rom tha Ylber. Sipas tij së fundmi komuniteti rom ka dërguar peticion deri te ata për të kërkuar nga institucionet e vendit që tua mundësojnë kushtet elementare për jetesë.

“Komuniteti rom është më së tepërmi i anashkaluar nga institucionet e shtetit dhe kemi tre peticione Janë peticione të ardhura nga një organizatë joqeveritare dhe jemi në vazhdim të procedurave shpresoj të kemi epilog pozitivë sepse janë kërkesa elementare pavarësisht se vendi dhe pozita ku janë ndërtuar objektet është i pa legalizuar  dhe pa privatizim mirëpo komuniteti rom kërkon në një far mënyre nga institucionet e Kërçovës ta realizojnë këtë në mënyrë juridike” tha Rufati.

Avokatura e popullit ka të drejtë të ngrejë procedurë edhe pa i informuar qytetarët nëse shohin padrejtësi tek institucionet e shtetit.

Vitin e kaluar në këtë zyrë janë pranuar 255 lëndë, ndërsa 187 nga këto kanë marrë epilog pozitiv. Pjesa e mbetur është në procedurë e sipër./TV21