Kompania amerikane e inteligjencës artificiale, Anthropic, ka bllokuar disa llogari pas zbulimit të përpjekjeve për përdorimin e modeleve të saj në kërkime që mund të ndihmonin në zhvillimin e armëve biologjike.
Sipas kompanisë, studiuesit kishin anashkaluar disa nga kontrollet e vendosura për të kufizuar qasjen në modelet e AI-së dhe ishin përpjekur të maskonin qëllimin e kërkimeve të tyre.
Anthropic nuk ka bërë të ditur identitetet e studiuesve apo institucioneve me të cilat ishin të lidhur, vendet ku ndodheshin apo agjentët biologjikë që po studioheshin.
Kompania theksoi se nuk mund të përcaktonte me siguri nëse kërkimet kishin qëllime të ligjshme apo të dëmshme, pasi kërkimet biologjike mund të përdoren edhe për qëllime të dobishme, si zhvillimi i vaksinave.
Anthropic tha se ka ndërmarrë masa ndaj llogarive të lidhura me këto kërkime, ndërsa rasti ka rritur shqetësimet për mundësinë që inteligjenca artificiale të ulë barrierat për zhvillimin e armëve biologjike.