Opozita shqiptare të premten e kaluar tha se ligjin për shtetësi e ka gati dhe se të hënën do ta dorëzojnë deri tek deputetët e LSDM-së, për shqyrtim përfundimtar.
“Pjesa jonë e punës është e kryer, kanë mbetur intervenime teknike, dhe besoj që ditën e hënë do të dorëzohet grupit parlamentar të socialdemokratëve, pra të shumicë parlamentare dhe presim eventualisht ndonjë vërejtje të tyre po besoj se shumë shpejtë do të procesohet në Parlament. Tash pjesa jonë është kryer ta shohim përgjigjen e tyre”, tha Elmi Aziri nga Aleanca për Shqiptarët.
Por koordinatori i grupit parlamentarë të LSDM-së, Jovan Mitrevski pohoi se ata ende nuk e kanë parë ligjin sepse i njëjti ende nuk është dërguar deri tek ata.
“Propozim-ligjin ende nuk e kemi marrë si tekst që të mund të hyjë në procedurë parlamentare. Nga ajo që e kam si informatë është se ende i harmonizojnë detajet teknike të ligjit. Sapo ta marrim dhe të shohim se ajo që është dërguar është e njëjta marrëveshje për të cilën jemi marrë vesh, atëherë mund të deklarohemi për ligjin”, deklaroi Jovan Mitreski nga LSDM.
Edhe nga Aleanca për Shqiptarët sot konfirmuan se draftin-ligjin ende nuk e kanë dorëzuar në Kuvend, por thonë se është çështje dite, pa precizuar ditë konkrete.
Për ligjin për shtetësi koalicioni ASH dhe AAA kishte bllokuar disa ligje në Kuvend, ndërsa disa herë janë zhvilluar takime mes kryeministrit Zaev, me kryetarët Sela dhe Gashi. Gjithashtu ishte zhvilluar takim mes koordinatorëve të grupeve parlamentare për të arritur deri te zgjidhja përfundimtare e ligjit.