Të mos anashkalohen rekomandimet e Misionit vlerësues për reforma në Këshillin gjyqësor, rekomandojnë pjesë e ekspertëve të drejtësisë, pas paralajmërimit të qeverisë për shpërbërje të plotë të Këshillit gjyqësor. Sipas ish gjykatëses në Strasburg, Margarita Caca Nikollovska, përkundër idesë për shpërbërje të plotë, është e rëndësishme që të vlerësohet përgjegjësia individuale. Ekspertët europianë përpiluan 40 rekomandime për reforma, por nga Ministria e Drejtësisë nuk ka përgjigje se çfarë do të bëjnë me rekomandimet që janë nën kompetencat e tyre.
“Nuk është në rregull as ndaj ekspertëve ndërkombëtarë e as ndaj veprimit nacional që të anashkalohet kjo punë, dhe nevojitet, edhe nëse nuk ka vullnet politik, të krijojnë vullnet politik, t’i shikojnë punët dhe të japin sqarim para opinionit”, shtoi Margarita Caca Nikollovska.
Kryeministri Hristijan Mickoski përsëriti se mbetet në premtimin parazgjedhor për shpërbërjen Këshillit nëse ndërkohë nuk merr propozim më të mirë për reforma. Ai e hodhi poshtë, siç tha, tezën e opozitës, se nën presionet e BE-së do të tërhiqej nga synimi i tij.
“Askush nuk mund të ma ndrydhë dorën, jam i madh, falë Zotit”, theksoi Hristijan Mickoski, kryeministër.
Për Bruksel, ideja për shpërbërjen e Këshillit është çështje për shqetësim serioz për shkak të përzierjes së pushtetit ekzekutiv në punën e pushtetit gjyqësor. Me qëndrim të këtillë janë edhe disa nga ekspertët vendorë.
“Në këtë mënyrë, pa argumente që do të ishin objekt i prezantimit publik, debatit publik etj., paraqet përzierje në punën e pushtetit gjyqësor, pushteti ekzekutiv kur sjell vendimet e tij duhet t’i prezantojë në publik dhe t’i argumentojë”, pohoi Margarita Caca Nikollovska.
Me rekomandimet e ekspertëve europianë propozohet që anëtarët e Këshillit të zgjidhen në Kuvend në të njëjtën mënyrë siç zgjidhen edhe anëtarët e Komisionit Antikorrupsion. Po ashtu, në të ardhmen anëtarët e Këshillit do të ishin propozim i Odës së Avokatëve dhe profesorëve të Fakultetit Juridik, ndërsa ndërrohen edhe dispozitat për përvojën e nevojshme në profesion. Euroambasadori Dejvid Gir kohë më parë tha se pikërisht këto rekomandime janë udhërrëfyesi për reformat në Këshillin gjyqësor.