Dhjetë persona kanë humbur jetën dhe mbi 40 të tjerë janë plagosur të dielën në mëngjes, pas daljes nga rruga të një autobusi me targa të Kosovës, në autostradën afër Sllavonski Brodit në Kroaci. Aksidenti ka ndodhur në rreth orës 06:20 të mëngjesit. Mbi 40 udhëtarët e lënduar janë hospitalizuar në spitalin e përgjithshëm në Sllavonski Brod ku u është dhënë ndihma e nevojshme shëndetësore.
“Këtë mëngjes rreth orës 06.20 është ndodhur fatkeqësi trafiku në autostradë, ku bëhet fjalë për një autobus me targa të Kosovës, në autobusin ishin 67 pasagjerë dhe 2 vozitës, për fate të keq, 10 udhëtarë, përkatësisht 9 udhëtarë dhe njëri prej vozitësve humbën jetën dhe në këtë rast shpreh ngushëllime familjeve të tyre. 44 udhëtarët e tjerë janë hospitalizuar në spitalin e përgjithshëm në Sllavonski Brod ku u është dhënë ndihma e nevojshme shëndetësore, prej tyre, 8 janë të lënduar rëndë, sipas informacioneve ndaj 4 prej tyre është bërë ndërhyrje kirurgjike, të tjerët janë duke u trajtuar, disa me lëndime më të lehta disa me më të rënda”, deklaroi Damir Trut, zyrtar policor
Nga Ministria e Punëve të Jashtme e Kosovës kanë njoftuar se 15 persona prej të lënduarve janë në gjendje të rëndë. E këtë në një konferencë për media e ka konfirmuar edhe Shefi i spitalit kirurgjik Josip Samarxhiq.
“Sa u përket lëndimeve, te fatkeqësitë e këtilla të rënda është tipike që të kemi disa lloje lëndimesh, 15 pacientë janë me lëndime të rënda në këtë fatkeqësi, 2 prej tyre trajtohen në repartin e kujdesit intensiv. Ndërmerren të gjitha masat për kurimin e tyre intensiv dhe kujdes”, tha Josip Samarxhiq, shefi i spitalit kirurgjik.
Autobusi që pësoi aksident po udhëtonte nga Frankfurti për në Prishtinë me atdhetar kosovarë që punojnë në Gjermani, e të cilët po ktheheshin për pushime në shtëpitë dhe familjet e tyre.
Krerët shtetëror nga Kroacia, Kosova, Shqipëria dhe Maqedonia kanë shprehur ngushëllime familjarëve të viktimave.