Kemi nevojë për një fitore të pastër, si në Gostivar, në mënyrë që të mos ketë më komuna të udhëhequra nga BDI-ja dhe për fitoren e koalicionit Aleanca-Alternativa në zgjedhjet e ardhshme parlamentare, porositën lideri i Aleancës për Shqiptarët, Ziadin Sela dhe i Alternativës, Afrim Gashi në tubimin në sallën e sportit “Mlladost” në Gostivar.
“Të dielën me dorë ta tregoni rrugën e dritës. Pas 17 tetorit, nuk do të ketë më komuna të udhëhequra nga BDI-ja, sepse koalicioni ynë do të fitojë nga Struga deri në Likovë. Thuajuni njerëzve se ne kemi nevojë për një fitore bindëse, për të fituar pastër si në Gostivar në raundin e parë”, tha Sela.
Ai iu referua mesazheve të fushatës të kundërshtarëve të tyre, të cilët e fajësojnë Taravarin për një numër të kazinove në Gostivar.
“Ata flasin për kazinotë dhe e fajësojnë Taravarin. Lejet janë nënshkruar nga ministri i tyre. Ligji për kazinotë është në parlament, por ata nuk e votuan atë. Kazinotë do të hiqen kur të largohen dhe të shkojnë në opozitë, sepse e kërkojnë paturpësisht votën tuaj”, tha Sela.
Lideri i Alternativës, Afrim Gashi, foli para popullit të Gostivarit për optimizmin që po përhapet tek anëtarët para zgjedhjeve dhe u kërkoi atyre që të dalin më masivisht dhe të votojnë për ta.
“Ju qytetarë gostivarë, duke votuar për Taravarin më 17 tetor, mos votoni vetëm për Gostivarin. Kjo fitore do të jetë paralajmërim për një fitore edhe më të madhe që na pret në zgjedhjet parlamentare. Me siguri edhe një herë do t’ju çojmë në votim, në mënyrë që të ketë një ndryshim dhe një shumicë të re që nuk do të lejojë marrjen e autorizimeve të Taravarit dhe çdo kryetari të suksesshëm”, tha Gashi.
Kandidati për kryetar të komunës së Gostivarit, duke kërkuar mbështetje për një mandat tjetër, foli për punën e tij dhe theksoi se ka arritur shumë me ekipin e tij.
“Ne jemi komuna e parë për sa i përket besueshmërisë, dhe e fundit vetëm sa i përket korrupsionit. Kjo na bën krenarë dhe me këtë e kërkojmë votën. Programi ynë quhet “Transformimi i qytetit”. Ne kemi punuar shumë në infrastrukturë dhe tani është radha e turizmit për katër sezone. Duam një mandat tjetër, sepse duam të vazhdojmë me transparencë. Kundërshtari ynë doli në një konferencë shtypi duke njoftuar realizimin e 24 projekteve, por më duhet t’u them se tashmë i kemi realizuar 18 prej tyre”, tha Taravari.