Opozitarja VMRO-DPMNE sot sërish protestoi kundër shtrenjtimit të rrymës.
Marshuan deri tek Komisioni Rregullator për Energjetikë, e për këtë edhe bllokuan kryqëzimin afër godinës së Komisionit. Deputeti i VMRO-DPMNE-së, Vllado Misajllovski, kërkoi ndjesë për trafikun e shkaktuar, por shtoi se këtë po e bëjnë për të mirën e të gjithë qytetarëve.
Përfaqësuesit e DPMNE-së deshën që deri tek Komisioni Rregullator të dorëzojnë kërkesat e tyre, por hasën në dyert e mbyllura të KRRE-së.
Ndër kërkesat, të cilat Misajllovski i përmendi para gazetarëve, janë zvogëlimi i çmimit të rrymës, rikthimi i çmimit të vjetër dhe dorëheqja e anëtarëve të KRRE-së, bashkë me kryetarin Marko Bislimovski, të cilët i quajti njerëz partiak.
Vllado Misajllovski paralajmëroi se VMRO-DPMNE nuk do të ndalojë me protesta, ndërsa u bëri thirrje qytetarëve të bashkohen me ta./TV21