Gjuha maqedonase dhe larmia e saj dialektore kanë vazhdimësinë e tyre në kohë dhe hapësirë. Identiteti maqedonas e merr legjitimitetin e tij nga traditat shumëshekullore. Kujtesa e përbashkët e hapësirave ballkanike dhe mesdhetare nënkuptojnë qasje inkluzive, e jo përvetësim ekskluziv i historisë dhe traditës. Këto janë disa nga pikat e Rezolutës të cilën opozitarja VMRO-DPMNE do ta dorëzojë në Kuvend, si formë e vendosjes së vijave të kuqe ndaj Bullgarisë, e cila kontestohen identitetin maqedonas.
“Vlerësojmë se Kuvendi si shtëpi ligjvënëse është vendi i vërtetë ku në vend të polarizimit, forcat politike duhet të bashkohen dhe të sjellin Rezolutë të përbashkët. Rezoluta për çështjet nacionale sillen edhe në Bullgari, Gjermani, Slloveni, Rumani e Itali. Atëherë pse Maqedonia do të bënte përjashtim dhe pse pushteti nuk do të ishte i gatshëm në Kuvend të hapim debat dhe të ndërtojmë konsensus të gjerë për propozim-rezolutën për linjat e kuqe maqedonase”, tha Antonia Milloshovski nga VMRO-DPMNE.
Reaguan nga partia në pushtet, Lidhja Socialdemokrate. Thonë se me sa duket Micskoski dhe VMRO-DPMNE-ja nuk janë të sigurt se identiteti dhe gjuha maqedonase janë të pranuara dhe konfirmuara.
“Gjuha dhe identiteti maqedonas janë të konfirmuara dhe të njohura ndërkombëtarisht dhe nuk ka nevojë për asnjë lloj debati për këto çështje, veçanërisht jo në Kuvend. E gjithë Evropa, e gjithë bota e di se cilat janë pozicionet tona identitare por duket qartë se vetëm Mickoski dhe VMRO-DPMNE-ja nuk janë të sigurt për këtë”, thonë nga LSDM.
Bashkimi Demokratik për Integrim i bën thirrje VMRO-DPMNE-së të ndihmojë në përpjekjet për zgjidhje duke u treguar konstruktive në Kuvend.
“BDI dhe shumica parlamentare intensivisht punojnë për tejkalim të kontestit në frymën e Marrëveshjes për Fqinjësi të mirë, pa e lënë kontestin në funksion të politikave ditore. Thërrasim opozitën të kyçet në përpjekjet që shteti ynë të integrohet në BE, në mënyrë konstruktive përmes kontributit të saj, për Parlament funksional dhe mbështetje të ligjeve reformues”, u shpreh Arbër Ademi nga BDI.
Koalicioni Aleanca-Alternativa tash për tash nuk ka vendim nëse do ta mbështesin Rezolutën.
“Ne nuk kemi vendim definitiv a do ta përkrahim atë Rezolutë, këto ditë do të ketë mbledhje Kryesia Qendrore e Aleancës për Shqiptarët, së bashku me Alternativën, me siguri do ta sjellim vendimin përfundimtar dhe deputetët tanë me siguri nesër ose pasnesër do ta tregojnë qëndrimin definitiv në ndonjë prej pres konferencave që do të mbahet në Kuvend”, deklaroi Arben Taravari nga Aleanca për Shqiptarët.
Nga partia Liberal demokrate, kryetari Goran Milevski na tha se në fillim do ta shqyrtojnë Rezolutën e më pas do të dalin me qëndrim. Shton se “në princip bashkimi në Kuvend rreth çështjeve të rëndësishme politike është gjë e mirë për shtetin dhe të tilla, ose çfarëdolloj Rezolutash duhet që paraprakisht të dakordësohen e më pas të miratohen, pa etiketa politike”.
Rezoluta e VMRO-DPMNE-së vjen pas akuzave të njëpasnjëshme se Qeveria e Zaevit po shet interesat nacionale maqedonase në Sofje. Kryeministri publikisht është deklaruar se bisedime për identitetin dhe gjuhën nuk ka dhe nuk do të ketë, ndërsa ditë më parë për TV21 tregoi se ka zgjidhje të pranueshme për të dyja palët. Rregullorja e Kuvendit parasheh që miratimi i rezolutave bëhet përmes formës së leximit dytë të ligjeve, ku detyrimisht parashikohet diskutim i përgjithshëm.