Në ora 4.17 një tërmet i fuqishëm me magnitudë 7.8 ballë goditi Turqinë dhe Sirinë. Sipas autoriteteve turke epiqendra e tërmetit ishte afër qytetit të Gaziantepit në pjesën jugore të Turqisë.
Numri i viktimave dhe i të lënduarve ka shkuar në qindra dhe vazhdimisht është në rritje.
Nga pamjet që qarkullojnë në rrjetet sociale shihet se si ekipet e shpëtimit të Turqisë po largojnë fëmijët që kanë mbetur nën rrënojat e banesave.
E në njërën nga ndërtesat që u rrezua pas dëmtimeve nga lëkundjet e forta të tërmetit, sipas banorëve, në ndërtesë kishte njerëz brenda.
“O Zot i madh njerëz kishte brenda, përse nuk dolën. Njerëz kishte brenda”.
“Shiko, shiko! Eja, eja këtu. “
Kërkimet nën rrënoja ende vijojnë. Forcat e Armatosura të Turqisë kanë hapur një korridor ajror për ndihmë, ndërsa në kërkim të trupave janë aktivizuar në mënyrë të vullnetshme shumë qytetarë.
Ministri i Mbrojtjes Hulusi Akar tha kanë mobilizuar avionët për të dërguar ekipe mjekësore, ekipe kërkimi dhe shpëtimi dhe automjete në rajonet e prekura nga tërmeti.
“Detyra juaj është e rëndësishme. Qytetarët tanë t’i ngushllojmë, t’i ndihmojmë. Shpresojmë se me punë të suksesshme të mundemi të zbresim sa më poshtë. Punë të mbarë!”, tha Hulusi Akar, ministër i Mbrojtjes.
Ndërkaq presidenti i Turqisë, Rexhep Taip Erdoan, tërmetin e cilësoi si katastrofën më të madhe që nga tërmeti i vitit 1939 në Erzinxhan.
“Mëngjesin e sotëm në ora 04:17 na ka tronditur katastrofa më e madhe që nga tërmeti i vitit 1939 në Erzinxhan. Institucionet shtetërore me të gjitha shërbimet janë mobilizuar në rajonin e prekur nga tërmeti. Vazhdojnë aktivitetet e kërkim-shpëtimit të qytetarëve tanë që kanë mbetur nën rrënoja në rajonet e goditura nga tërmeti”, tha Rexhep Taip Erdoan, president i Turqisë.
Erdoan tha se më shumë se 900 shpëtimtarë aktualisht janë duke kërkuar të zhdukurit pas tërmetit dhe se numri i tyre vazhdimisht po rritet. Deri më tani nga rrënojat janë shpëtuar 2.470 persona ndërsa numri i ndërtesave të rrënuara ka shkuar në 2.818. Presidenti turk tha se 45 vende kanë ofruar ndihmë për Turqinë.