Tri shqiptare në Ligën e Gruas Profesioniste të Teatrit në Nju Jork, Vinca për TV21: Na u vlerësua puna profesionale/VIDEO

Tri shqiptare do të jenë pjesë e Ligës së Gruas Profesioniste të Teatrit në Nju Jork. Ilire Vinca me prejardhje nga Struga, Burbuqe Berisha dhe Zana Hoxha janë artistet që e futën Kosovën në hartën e shteteve më të fuqishme në botë dhe i treguan botës, se gratë janë profesioniste dhe ia dalin.

Si një profesoreshë në Fakultetin e Arteve në Universitetin e Prishtinës dhe si aktore, Ilire Vinca do të ligjërojë sot online në Nju Jork të Amerikës për Edukimin teatror: Arritja përtej skenës.
(Linku deri te ligjërata: KËTU)

Ajo për portalin tv21.tv ka treguar rëndësinë e këtij kandidimi dhe vlerën që ai ka për artin shqiptar në përgjithësi.

“Për mua ky vlerësim e nderim do të thotë shumë. Në këtë botë joperfekte, arti është i domosdoshëm. Ndonjëherë mendoj që profesioni më zgjodhi mua, me këtë detyrë të bukur e të vështirë. Ky vlerësim vjen për punën qe ne si gra artiste e bëjmë në vendet tona, në edukimin e gjeneratave dhe kapërcimin e kufijve personal dhe kufijve gjeografikë me artin tonë”, shprehet artisja Vinca.

Vinca është njëra nga 26 të nominuarit nga 18 vendet e botës. Ndryshe nga hera e parë, këtë herë ajo në këtë Ligë do të shoqërohet edhe me Burbuqe Berishën dhe Zana Hoxhën. Edhe për këtë shoqërim, ajo ndjehet tejmase e gëzuar.

“Këtë herë, që është e dyta për mua, unë e ndaj gëzimin e këtij vlerësimi me dy artiste e kolege fantastike, Burbuqe Berisha dhe Zana Hoxha të cilat janë në mesin e 17-të të të nominuarave nga 28 vende të botës, duke e radhitur kështu pjesëmarrjen më të madhe të Kosovës, pas Anglisë”, shprehet Vinca për portalin tv21.tv

Ndërkaq Zana Hoxha më herët për këtë nominim është deklaruar krenare për faktin se Kosova është bërë pjesë e hartës së shteteve ku gratë ia dalin të jenë profesioniste.

“Ilirja për herë të dytë ndërsa unë dhe Buqja për të parën, e kemi futur Kosovën në hartën e shteteve, ku gratë ia dalin të jenë profesioniste të zonja, edukuese përmes artit e edhe frymëzuese për gjeneratat e reja”, është shprehur Hoxha.

Ndërkaq Burbuqe Berisha do të ligjërojë më 22 shkurt.
(Linku deri te ligjërata: KËTU)

Ju dëshirojmë suksese!