Trajanov kushtëzon zgjerimin e Qeverisë/ “BDI ka probleme, ajo duhet ta paguajë çmimin”

TË FUNDIT

“BDI ka probleme me grupin parlamentarë dhe ajo duhet ta paguaj çmimin.” Kështu tha Kryetari i Lidhjes Demokratike, Pavle Trajanov duke komentuar hyrjen e ASh-së në Qeveri. Trajanov mbrëmë deklaroi se do të mbështeste zgjerimin e qeverisë me Aleancën për Shqiptarët vetëm nëse në përbërjen qeveritare sigurohet përfaqësim i drejtë dhe adekuat i të gjitha bashkësive etnike në vend. Shtoi se sipas përfaqësimit të drejtë dhe adekuat në Qeveri duhet të ketë 5-6 ministra shqiptarë dhe jo më shumë.

“Ne si parti nuk jemi gati të pranojmë shantazhe. Partia që ka probleme me grupin parlamentar duhet ta paguajë çmimin. Tani BDI-ja i ka gjashtë pozita ministrore. Nëse duan një partner të ri, atëherë duhet të heqin dorë nga dy vende. Kjo do të ishte mirë. Edhe në përgjithësi mendoj se përfaqësimi i drejtë nënkupton diku 5-6 vende ministrore sepse ashtu jemi ndarë dhe ashtu është konceptuar Kushtetuta për përfaqësim të drejtë të bashkësive etnike, ashtu duhet të zbatohet edhe në praktikë”- deklaroi Pavle Trajanov, kryetar i PD-së.

Ndërkaq partnerët e tjerë të koalicionit , Monika Zajkova, kryetare e PLD-së dhe Maja Moraçanin nga RDM thanë se do të mbështesnin gjithçka që do të nënkuptonte përshpejtimin e rrugës për BE, por pasi që të marrin vesh se cili është qëllimi për zgjerimin e qeverisë.

“Si partner koalicioni kërkuam që nëse me të vërtetë intensifikohen bisedimet dhe shanset për rritjen e shumicës janë më të qarta, atëherë të kihet kujdes për kapacitetin programor të koalicionit. Gjegjësisht në cilat kapacitet të programit do të bazohet koalicioni dhe cili është potenciali kadrovik”- deklaroi Monika Zajkova, kryetare e PLD-së.

“Dua të dëgjoj së pari informatat, çfarë po planifikohet, cili është qëllimi i një rritjeje të mundshme të shumicës, çfarë do të thotë si në aspektin programor ashtu edhe në lidhje me vendimet e kadrovike, dhe sigurisht çfarë është e rëndësishme për RDM-në, ne duam të imponojmë çështjet dhe temat që janë të rëndësishme për ne që të zbatohen”- pohoi Maja Moraçanin, Kryetare e RDM-së.

Nga ana tjetër Aleanca për Shqiptarët ka krijuar ekip për negociata me kryeministrin Kovaçevski për ndarje të resorëve dhe ministrive, por kryeministri Kovaçevski tha se nuk ka afat konkret se kur do të ndodhë zgjerimi i Qeverisë.

error: Content is protected !!