7 milion e 300 mijë denarë ka kushtuar rikonstruimi i stacionit hekurudhor në Tetovë. Ky stacion ishte ndërtuar që nga viti 1952. Drejtori i Ndërmarrjes Publike për Infrastrukturën Hekurudhore Festim Halili, tha se ky stacion është rikonstruuar në tërësi dhe se nga dita e sotme është në funksion.
“Projekti ka kushtuar 7.3 milion denarë dhe në këtë projekt janë përfshirë një konglomerat i aktiviteteve ndërtimore, ndërrimi i tërësishëm i pullazit të stacionit hekurudhor, është zgjidhur një problem i kamotshëm, është zgjidhur problemi i kanalizimit atmosferik pasi që këtu janë mbledhur shumë ujëra”, tha Festim Halili – Drejtor i Hekurudhave.
Një nga makinistët e trenit, Qamil Qaili, i cili është me pervoje pune 36 vjecare në Hekurudhat e Maqedonisë, thotë se problemi më i madh i makinistëve është mosrespektimi i sinjaleve të mbikalimeve hekurudhore nga ana e qytetarëve, prandaj edhe siç thotë, jo rrallë herë kanë ndodhur aksidente. Qaili thotë se drejton një tren për mallra që është në funksion që 35 vite.
“Kemi shumë probleme me qytetarët, më së shumti kjo pjesa këndej, pasi që nuk e respektojnë sinjalizimin, në vendkalim sinjalizimi ndizet, ata nuk ndalen”, u shpreh Qamil Qaili – makinist.
Treni që vozitni i cilit vit është?
“Po është aty, i vitit ‘85”.
Treni në Tetovë kalon dy herë në ditë, edhe atë një herë në mëngjes me destinacion Shkupin dhe destinacioni tjetër është për në Kërçovë.
Disa qytetarë të anketuar nga TV21 deklaruan se për herë të fundit kanë udhëtuar me tren në vitet e ’90, disa nuk kanë udhëtuar asnjëherë e disa as që ishin në dijeni për transportin hekurudhor.
“Për së fundi herë që kemi shkuar në Beograd, në vitin ‘92, ajo ka qenë hera e fundit. Po nuk funksionojnë, moti nuk funksionojnë nga Shkupi për në Beograd”.
“Nuk e di, jo asnjëherë nuk kam udhëtuar”.
“I vogël kur kam qenë, nuk e dimë edhe a punon stacioni.”
“Nuk e dimë a punon”.
Maqedonia është vendi i parë në Evropë që vendosi të blejë trena nga Kina për trafikun hekurudhor. Përveç gjashtë trenave me naftë dhe motor elektrik për trafikun e udhëtarëve, janë blerë edhe katër lokomotiva elektrike të cilat përdoren kryesisht për mirëmbajtjen e trafikut hekurudhor të mallrave.