Pesëdhjetë e tre qytetarët të cilët janë të izoluar për shkak të Pandemisë, gjatë ditës së sotme kanë votuar në qytetin e Tetovës. Nazmi Dauti nga këshilli komunal zgjedhor thotë se nga kërkesa sa ka pasur deri më 8 korrik, 55 janë pranuar ndërsa kanë mundur të votojnë vetëm 53 për shkak se dy personave u është përkeqësuar gjendja edhe janë transferuar në spital.
“Jemi në kontakt të vazhdueshëm me kryetarët e këshillave zgjedhor dhe deri në këto momente nga 55 personat e paraqitur kanë votuar 30 persona. Procesi është në vijim e sipër, janë të ndarë në dy grupe një grup është në qytetin e Tetovës dhe grupi tjetër në fshatrat e malësisë dhe fshatrave për rreth që i takojnë komunës së Tetovës”,, tha Nazmi Dauti nga KKZ-Tetovë.
Ekipi I televizionit 21 ka ndjekur edhe komisionin e posaçëm ku anëtarët e komisionit të përbërë nga mjekët dhe të shoqëruar nga Sektori për punë të brendshme kanë mundësuar që personat në izolim të votojnë.
“Jemi në gatishmëri gjithë ekipi në përbërje prej 7 anëtarësh, unë si kryetar i komisionit gjithsej deri më tani kanë votuar 15 perona, ndërsa në listë janë 35 persona. Në ora 7 i gjithë ekipi ka qenë në dispozicion, ka pranuar materialin zgjedhor dhe mbas atij moment është filluar procesi në bazë të protokolleve për votim”, u shpreh Astrit Neziri, kryetar i Komisionit.
Procesi i votimit është duke u mbajtur me masa të posaçme ku anëtarët e këshillit pas çdo votimi do të duhet të ndërrojnë mjetet mbrojtëse, ndërsa gjatë ditës së nesërme pritet të votojnë personat e sëmurë dhe të burgosurit.