Tetovë: Nënkalimi në lagjen “Dardania” i bllokuar për javë! Komuna: Projekti ka kaluar, presim përmirësimin e kushteve klimatike

Nënkalimet në lagjen “Dardania” në këtë periudhë të shirave vazhdojnë të ngelen të mbyllura për kalimtarët shkaku i ujit të mbledhur. Të gjithë banorët duhet të kalojnë në një rrugë alternative, e cila është shumë më e gjatë se ky nënkalim. Zëvendëskryetari i Komunës së Tetovës, Albi Qamili, thotë se projekti është i gatshëm dhe tenderi ka kaluar, por për shkak të kushteve klimatike ky projekt nuk do të fillojë tani.

Ndërsa drejtori i NPK Sharrit, Valon Zeqiri, thotë se ndërmarrja do të gjejë një zgjidhje të përkohshme, pasi në këtë pjesë janë bërë disa lidhje të jashtëligjshme që shkaktojnë grumbullimin e ujit, por nuk përjashton mundësinë që të vendoset edhe një pompë për të nxjerrë ujin jashtë.

Para një jave, në këtë nënkalim vetëm për një paradite ngelën katër vetura të bllokuara nga uji, ndërsa sa herë ka pasur reshje shiu, njësia kundër zjarrit në Tetovë ka intervenuar, por reshjet e njëpasnjëshme kanë bërë që ky nënkalim të jetë i bllokuar për javë të tëra.