Tensione në Kuvend deri në 6 të mëngjesit! Propozim-ligji për “GAMA” e nxehi atmosferën në parlament!

Video-materiali që e incizoi deputeti Antonijo Milloshoski e pasqyron atmosferën e tensionuar e cila këto ditë dominon në shtëpinë ligjvënëse. Deputetët në debat maratonik deri në orët e hershme të mëngjesit. Argumentojnë dhe japin replika rreth zgjidhjes së kontestit mes Qeverisë dhe Makpetrol-SHA-Shkup. Në propozim-ligjin parashihet që Makpetrolit t’i njihet e drejta e pronësisë për 50% të gazsjellësit në vend dhe t’i paguhet çmim prej 33 milionë eurove.
Deputetët e VMRO DPMNE të veshur me xhaketa deri në orët e hershme të mëngjesit, thonë se zgjidhja e tillë ligjore nuk do të kalojë. Shumë prej tyre në rrjetet sociale publikuan fotografi dhe statuse.

“Ora është 6:15. Seancë maratonike prej 20 orëve në luftë të pandërprerë. Ende jemi këtu dhe nuk u lejojmë të kalojë VJEDHJA e tyre prej 33 milionë eurove. Mjaft me pasurimin e oligarkëve. Nuk guxon të ketë për Makpetrol, e të mos ketë për popullin. Kështu do të jetë çdoherë kur do të tentojnë në mënyrë të paligjshme të vjedhin nga populli”, shkroi deputeti Bojan Stojanoski.  

“Ora është 6:45 në Kuvendin e Republikës së Maqedonisë… seanca plenare për Qeverinë kriminale dhe zhvatëse të Zaevit dhe SDSSM me “ligj” që Makpetrolit (Telma) t’i paguhen 33 milionë euro, ende po zgjat… mbi 20 orë pa ndalur! Ju thashë – e gënjeni veten se mund të “na mposhtni kur bëhet fjalë për kondicion”, shkroi deputeti Igor Janushev.

Gjatë debatit që zgjati më shumë se 20 orë, deputetët e opozitës reaguan se ligji i propozuar vret drejtësinë dhe shkel parimet themelore të së drejtës. Përplasjet e ndërsjella vazhduan përmes konferencave të sotme për shtyp. Sipas opozitës, Qeveria dëshiron ta kalojë ligjin “në derë të vogël”.

“Anashkalimi i instancave gjyqësore dhe ndërhyrja e Parlamentit është një provë se Zaev është i vetëdijshëm për krimin që po bën, por ai nuk interesohet për popullin, e as për paratë e popullit. Për të, është i rëndësishëm vetëm interesi i tij”, tha Dafina Stojanovska – deputete e VMRO-DPMNE-së.

Pushteti mohon se ligji po sillet në mënyrë të përshpejtuar.

“Nuk nxitohet me asgjë. Sa i takon këtij rasti, bëhet fjalë për procedurë të rregullt të cilën ne si deputetë kemi për detyrë ta realizojmë, t’i realizojmë të gjitha projektet që kanë filluar paraprakisht… Është evidente se sjellja destruktive e grupit parlamentar të VMRO-DPMNE-së vazhdon në çdo aspekt të funksionimit të tyre në Kuvend”, deklaroi Mile Talevski – deputet i LSDM-së.

Shumica e deputetëve, përveç atyre të opozitës, nuk ishin prezentë në sallën kuvendore. Deputetët e VMRO-DPMNE-së reaguan edhe ndaj sjelljes së kryetarit të Parlamentit, i cili sipas tyre, shkel Rregulloren.

“Kështu shkelni Rregulloren. Sot e keni arritur kulmin me Rregulloren dhe seancat. Deputetët e opozitës ju kanë pritur në sallën kuvendore një orë”.

Opozitarët kërkuan nga kryeparlamentari të vendos veto në qoftë se ligji miratohet. Seanca, në rendin e dites të së cilës është projektligji do të caktohet në mënyrë shtesë.