Tejkalohet problemi që zgjat me dekada! Tregti e drejtpërdrejtë me energji elektrike mes Maqedonisë dhe Kosovës

Tregti e drejtpërdrejtë me energji elektrike mes Maqedonisë dhe Kosovës. Të dy operatorët – MEPSO dhe KOSTT lidhën marrëveshje për organizim të ankandeve për marrje me qira të kapaciteteve përçuese që janë në dispozicion. Marrëveshja operative do të mundësojë realizim të ankandit të parë ditor për marrje me qira të kapaciteteve përçuese në të dy drejtimet e largpërçuesit prej 400 kilovatëve, me të cilin do të lidhen të dyja vendet. Ky është një hap përpara për krijim të një tregu rajonal të energjisë elektrike, tha drejtori i MEPSO-s.

Nga ana tjetër, drejtori i KOSTT-it, Mustafa Hasani, shprehu kënaqësi që është tejkaluar problemi i deritanishëm.

Me marrëveshjen e re zgjidhet problemi që ka zgjatur me dekada të tëra për integrim të tregjeve rajonale dhe evropiane për energjetikë, ishin unanimë Hasani dhe Ramadani.  

Ankandet në emër të të dy operatorëve, do t’i organizojë Shtëpia e Ankandeve e specializuar për këtë veprimtari me seli në Podgoricë të Malit të Zi.

Qëllimi është që nga një qendër të organizohen ankande mes më shumë sistemeve elektrike fqinje, me qëllim që të reduktohen shpenzimet dhe të mundësohen kushte të drejta për të gjithë pjesëmarrësit në tregun e energjisë elektrike në nivel rajonal.

Drejtori i MEPSO-s, nuk deshi të flasë për kontestin rreth emërimit të tij, duke thënë se nuk dëshiron
ta prishë momentin e bukur. Ndryshe, emërimi i Ramadanit shkaktoi reagime të shumta në opinionin publik, para së gjithash nga Komisioni Shtetëror për Parandalim të Korrupsionit, prej ku thanë se Ramadani nuk mund ta ushtrojë funksionin – drejtor i MEPSO-s.

Si ish-anëtar i Komisionit Rregullator të Energjetikës, nuk ka kaluar as afati ligjor prej dy viteve para se ta marrë postin e ri, reaguan nga Antikorrupsioni.

Ramadani ishte zëvendëskryetar i KRRE-së, kurse muajin e kaluar, me propozim të BDI-së ishte emëruar për kryetar të Bordit Drejtues të MEPSO-s, në vendin e Eva Shukllevës.