Pas bisedimeve që kemi zhvilluar këto ditë, me shumë gjasa gjatë javës së ardhshme do të propozojmë kandidatin për ministër të shëndetësisë, deklaroi zëvendëskryeministri i parë Izet Mexhiti, i cili përsëriti se resori i shëndetësisë mbetet në kuadër të VLEN-it, por nuk deshi të japë më shumë detaje se kush do të trashëgoje Taravarin.
Se resori i shëndetësisë do të mbetet i VLEN-it konfirmoi edhe deputet i VMRO-DPMNE-së Bojan Stojanovski. Sipas tij, vendimi i Taravarit për t’u larguar nga Qeveria ishte shumë i gabuar.
“Në seancën e 20-të, pra javën e ardhshme, do të konstatohet dorëheqja e z.Taravari. Deri më tani, në Kuvend nuk janë dorëzuar dorëheqje nga anëtarët e tjerë të Qeverisë. Nga aspekti i resorëve, është e rëndësishme që marrëveshja për përfaqësim të barabartë të të gjitha partive politike do të mbetet e pandryshuar. Ndërsa për pjesën tjetër nuk ka shumë gjasa të ketë ndryshime, resorët me shumë gjasë do të mbeten të njëjtë”, tha Bojan Stojanovski, VMRO-DPMNE.
Mexhiti tha se shumica është e qëndrueshme dhe konfirmoi se në lojë janë 4 deputetë nga Fronti Europian të cilët pritet t’i bashkohen shumicës parlamentare, me çka, sipas tij, edhe pa Taravarin do të kenë 13-14 deputetë. Kur u pyet nëse kjo nënkupton negociata me Aleancën për Shqiptarët të Selës, Mexhiti nuk deshi të japë detaje, vetëm tha se janë pjesë e Frontit Europian.
Sipas Mexhitit, pjesa më e madhe e krahut të Taravarit është kundër bashkëpunimit me BDI-në, ndërsa lëvdoi punën e zëvendëskryeministrit për qeverisje të mirë, Arben Fetai.
Dje u formua grup i ri deputetësh, ku u ftuan të bëhen pjesë edhe deputetët e ASH-së së Taravarit. Grupi u formua pa ta dhe tani koordinator është Bekim Qoku.