Askush nuk e di saktësisht se cila është arsyeja e takimit të thirrur nga kryeministri shqiptar Edi Rama me liderët e partive shqiptare të vendit. Sipas ministrit të Jashtëm Bujar Osmani, takimi me shumë gjasa do të jetë për të shënuar festat e fundvitit dhe fillim vitin e ri e njëkohësisht të diskutohet edhe mbi gjendjen aktuale të të dyjave vendeve.
“E shoh edhe këtë takim si një në të cilin do të këmbehen informacione për zhvillimet aktuale në dy vendet tona, në rajon dhe pse jo edhe për sfidat me të cilat do të ballafaqohen vendet tona në vazhdim”, tha Bujar Osmani, ministër i Jashtëm.
Osmani mendon se nuk duhet të krijohen teori konspiracioni me temën e takimit për shkak se kryeministri Rama tashmë është dëshmuar si mik i Maqedonisë. Por nga VMRO-DPMNE-ja si duket nuk mendojnë kështu. Sipas tyre në Tiranë do të diskutohet për çështjen maqedonase.
“Interesante është fakti se si vetëm LSDM nuk ka asgjë kundër këtij takimi ku çështjet maqedonase koordinohen në Tiranë. Është e qartë se Aliu do ta mësojë Tiranën për agjendën e gjelbër ose Tirana do të përgatisë platformën e dytë të Tiranës të cilën pastaj Aliu do të ja japë Kovaçevskit. Marrëveshja e vetme e cila duhet të jetë është unifikimi kundër krimit dhe marrëveshje për zgjedhje që populli të vendosë”, thonë nga VMRO-DPMNE.
Nga ana tjetër nga partia e Bilall Kasamit, thonë se Kasami do të udhëtojë për në Tiranë, por nuk do të ulet në tavolinë me kreun e integristëve Ali Ahmeti.
Këtë qëndrim të Besës, Osmani e cilëson si politikë ditore për pikë politike.
“Vërtetë ata duhet të sqarohen para opinionit, para elektoratit të vet, për shkak se unë e shoh vërtetë si pa shije, pa plan dhe pa strategji dhe mbetet ata të shpjegojnë qëndrimin e tyre”, theksoi Bujar Osmani, ministër i Jashtëm.
Takimi i formatit të tillë liderësh për herë të parë ka ndodhur në Tiranë më 29 dhjetor 2016, nga i cili doli një Deklaratë e përbashkët e partive politike shqiptare për ruajtjen e interesit të shqiptarëve. Gjatë këtyre viteve kreu i BDI-së, Ali Ahmeti kishte ftuar një takim tjetër, por ishte bojkotuar nga liderët tjerë për shkak të deklaratës së tij publike se “nuk ulet me horra”. Një tentim i dështuar ishte edhe ai i Kasamit në nëntorin e vitit të kaluar.