Sulm terrorist në Vjenë, 4 të vrarë, 17 të plagosur! Vritet edhe sulmuesi nga Maqedonia

Me skena të këtilla u përballën mbrëmë banorët e Vjenës. Sulme terroriste me armë kishte në 6 pjesë të kryeqytetit austriak. Katër persona mbetën të vrarë, ndërsa 17 të plagosur. Sulmuesit u arrestuan. I vrarë mbeti njëri prej tyre, e që është konfirmuar se është nga Maqedonia e Veriut. Qyteti u blindua nga policia, ndërsa rrugët e kafenetë mbetën të shkreta pas sulmit.

Në mëngjes pasojat ishim më të dukshme. Policë gjithandej. Qytetarët thonë se ngjare e këtillë e tmerrshme edhe pritej.

“Është çmenduri. Diçka e tillë edhe pritej, edhe në Vjenë. Është qytet i madh. Berlin, Paris, është thjesht çështje kohe”, deklaroi Jozef Neubauer, qytetar i Vjenës.

“Falë Zotit isha në shtëpi kur ndodhi. Por dëgjova shpejt përmes internetit dhe Facebookut. Është e tmerrshme kjo që ndodhi, por mendoj se ishe e parashikueshme pas asaj që ndodhi në shtete të tjera viteve të fundit”, tha Nadine, shitëse në “Tabaco Shop”.

Kancelari austriak, Sebastian Kurc, tha se është konfirmuar që sulmi është terrorist islamik i bërë nga urrejtja ndaj, siç tha, vlerave themelore austriake, ndaj urrejtjes për mënyrën e tyre të jetesës dhe urrejtjen ndaj demokracisë.

“Të gjithë duhet të jemi të vetëdijshëm se ky nuk është një mosmarrëveshje midis të krishterëve dhe myslimanëve ose midis austriakëve dhe migrantëve. Jo, është një luftë midis shumë njerëzve që besojnë në paqe dhe atyre pak që duan luftë. Ishtë një luftë midis civilizimit dhe barbarizëm dhe ne do ta luftojmë me gjithë vendosmërinë tonë”, deklaroi Sebastian Kurc, kancelar i Austrisë.

Ministri për Punë të Brendshme, Karl Nahamer, theksoi se terrori dhe dhuna nuk kanë vend në shoqërinë austriake dhe se nuk do të lejojnë që sulme të këtilla të cenojnë ligjet dhe lirinë. Siguroi se sulmi terrorist do të zbardhet shpejtë.

“Do të ketë pasoja. Një prej sulmuesve ishte me rrip eksplozivi, që më pas rezultoi të ishte i rrejshëm dhe kishte edhe pushkë sulmi. Sulmuesi ishte mbështetës i organizatës terroriste ISIS. Hetimi po vazhdon dhe unë nuk mund të jap më shumë detaje për të mos e rrezikuar hetimin”, tha Karl Nahamer, ministër i Austrisë për Punë të Brendshme.

Qytetarëve u është bërë thirrje që të qëndrojnë në shtëpi. Reagime të ashpra ndaj këtij sulmi kanë ardhur nga të gjitha anët, krerë shtetërorë e figura të tjera, të cilët kanë dënuar sulmin.